Ахуыргæнæджы дæсныйад кæддæриддæр кадджын уыд. Ныртæккæ хъомылгæнджытæ æмæ ахуыргæнджытæ æвдисынц сæ арæхстдзинæдтæ. Сæ предмет куыд ахсджиаг у, методикæйæ куыд ифтонг у, уыдæттæ равдисын сæ бон вæййы алыхуызон фембæлдтыты, æмбырдты. Афтæ арæзт у Алайнаг гимназы кусджыты фæтк дæр.
Гимназы хæрзаудæн советы фæрцы царды уагъд цæуы фæлварæн проект 2023 азæй фæстæмæ, советæн разамынд дæтты Битарты Вячеслав. Сæ бæрæггæнæнтæ 80 процентæй уæлæмæ кæмæн ахизынц, уыдонæн ма сæ мыздмæ алы мæй дæр бафтауынц уæлæмхасæн æхца: ахуыргæнджытæн фæйнæ 20 мин сомы, уæлæмхасæн ахуырады специалисттæн – фæйнæ 15 мин сомы, хъомылгæнджытæн – фæйнæ 10 мин сомы.
«Гимназы кусджыты цæттæдзинад бæрæг кæныны руаджы сбæрæг вæййы ахуыргæнæджы дæсныйады æмвæзад. Нымад цæуынц алыхуызон рахæцæнтæ, хъуыддаг æрмæст предмет хорз зонынимæ баст нæу, сæйрагдæр – сывæллæттæм зонындзинæдтæ фæхæццæ кæнын, бæрæггæнæнтыл бафтауын. Иумæйагæй ахуырадон хъуыддагыл афæлгæсгæйæ, нæ бон бавæййы лæмæгъдæр бынæттæ сбæрæг кæнын, нæ тыхтæ уырдæм раттын.
Ныр ахуырадон хъуыддаджы æмвæзад иртасæм цыппæрæм хатт, æмæ мæ бон зæгъын у, скъоладзаутимæ чи кусы, уыдоны цæттæдзинад зынгæ кæй фæбæрзонддæр», – ахæм хатдзæг скодта Алайнаг гимназы разамонæг Цæразонты Мæдинæ. Цæттæдзинад иртасынц Башкираг университеты фæзыл, гимназы кусджытæ разæнгардæй архайынц мониторинджы. Алайнаг гимназы ахуыргæнæг Тедеты Илонæ куыд фæбæрæг кодта, афтæмæй, фыццаг хатт куы æвзæрстой сæ дæсны-
йады цæттæдзинад, уæд уайтагъд бамбæрстой сæ хъуагдзинæдтæ.
«Уый фæстæ райдыдтам нæ арæхстдзинæдтæ иртасын, хатдзæгтæ кæнын, фæзынынц уæлæмхасæн хабæрттæ æмæ адæймаг размæ цæуын райдайы. Хъуыддæгтæ нывыл уагыл куы ацæуынц, уæд ма нæм фенхъæлмæ кæсы финансон æххуыс дæр», – ра-
дзырдта райдайæн кълæсты ахуыргæнæг.
Ацы проект гимназы дарддæр æххæст кæндзысты, уый руаджы ахуырады къæпхæн дæр рæзы, размæ дæр цæуынц æм-хуызонæй. Гимназы кусджытæн фадат ис сæ дæсныйады æмвæзад бæрзонддæр кæнынæн. А сæрд гимназы дыууæ
ахуыргæнæджы хæрзаудæн советы æххуысæй сæ дæсныдзинад фæбæрзонддæр кодтой Мæскуыйаг физико-техникон институты. Дыууæ къуырийы дæргъы архайдтой хъæздыг программæйы. Цы зонындзинæдтæ дзы райстой, уыдонæй спайда кæндзысты, ахуырдзауты физикæ æмæ математикæйы олимпиадæмæ цæттæ кæнгæйæ.
Хуасдзауты Алинæ
