Августы фæстаг бонты Сочийы, ахуырадон центр «Сириус»-ы йæ куыст кодта Физикæйы ахуыргæнджыты æппæтуæрæсеон съезд. Æмбырды архай-
джытæ бæстон æрдзырдтой физикон ахуырады абоны уавæр æмæ йæ дарддæры райрæзты фæндæгтыл.
Съезды архайæг уыдысты хуыздæр ахуыргæнджытæ, фæлтæрдджындæр методисттæ æмæ къабазы кусæг эксперттæ – æдæппæт 350 делегаты бæстæйы 59 регионæй (иннæ субъектты минæвæрттæн уыд съезды
дæрддзæгмæ архайыны фадат).
Цæгат Ирыстонæй съезды уыдысты Ахуырады къабазы кусджыты дæсныдзинад бæрзонддæр кæныны республикон институты хистæр ахуыргæнæг, педагогон наукæты кандидат Дзеранты Алетæ æмæ Физикон-математикон
республикон лицей-интернаты физикæйы ахуыргæнджытæ Баликъоты Алетæ æмæ Гуылчеты Ритæ.
Съезды пленарон æмæ секцион æмбырдты архайджытæ лæмбынæг æркастысты къабазы кусæг специалистты профессион цæттæдзинад æмæ дæсныдзинад бæрзонддæр кæныны, физикæйы кабинетты техникон ифтонгдзинад æмæ амынд предметæй ног методикон чингуытæ уадзыны, Иумæйаг паддзахадон фæлварæн дæттыны, техникон предметтæй уæлæмхасæн ахуырад ахадгæдæр кæнын æмæ æндæр ахæм фарстатыл.
Æмбырды делегаттæн уыд фæлтæрдджындæр педагогты мастер-класстæ бабæрæг кæныны, зындгонд специалистты лекцитæм байхъусыны, æндæр ахæм мадзæлтты архайыны фадат.
Федералон агентад «Рособрнадзор»-ы разамонæг Анзор Музаев, Мæс-
куыйы физикон-техникон институты ректор Дмит-рий Ливанов, национ ядерон иртасæн университет «МИФИ»-йы Технологон институты директор Владимир Рябцун æмæ иннæ докладгæнджытæ съезды делегаттæм фæхæццæ кодтой сæ хатдзæгтæ æмæ фæндæттæ, дзуаппытæ сын раттой сæ бирæ фарстытæм.
Иу ныхасæй, съезд ссис, физикæйы ахуырады ахсджиагдæр фарстатыл æппæтвæрсыг æмæ пайдайаг ныхас кæм рауад, ахæм фæзуат. Кæронбæттæны делегаттæ цы уынаф-
фæтæ рахастой, уыдон ахъаз уыдзысты физикæйæ ахуырадон прог-
раммæтæ хъомысджындæр кæнынæн, инженерон æмæ æндæр техникон дæсныйæдтыл ахуырад бæрзонддæр къæпхæнмæ исынæн, педагогон æмæхсæнады минæвæртты кад бæрзонддæр кæнынæн.
Ахуыргæнджыты æмбырдæн фадæттæ сарæзтой Мæскуыйы М. Ломоносовы номыл паддзахадон университет, Мæскуыйы физикон-техникон институт, национ ядерон иртасæн университет «МИФИ», национ иртасæн центр «Курчатовы институт» æмæ наукон-технологон университет «Сириус». Съезд цæттæгæнæн архайдмæ сæ бавæрæн бахастой Уæрæсейы Рухсады æмæ Наукæ æмæ уæлдæр скъолайы министрадтæ æмæ æндæр профилон федералон ведомствæтæ…
СЛАНТЫ Аслан
