Дыууæ азæй фылдæр рацыд, Ногир æмæ Михайловскы астæу цы хид ис, уый тыхджын донивылды аххосæй куы фехæлд, уæдæй.
Стыр зындзинæдтæ сæвзæрд уыцы цауы фæстиуæгæн, уæлдай тынгдæр та фæзынд хæдтулгæскъæрджытыл. Транспорты гуылфæн йæхицæн фæагуры æндæр фæндæгтæ, æмæ Дзæуджыхъæуы уынгты дæр хатгай азмæлæнтæ нал вæййы. Тынг æнхъæлмæ кæсынц республикæйы цæрджытæ хиды байгоммæ, пъланмæ гæсгæ хъуамæ срæвдз уа афæдзы кæронмæ, фæлæ, куыстытæ ныр куыд цæуынц, афтæмæй, чи зоны, уыцы бон фæхæстæгдæр уа.
Ахæм хъуыдымæ æрцæуæн ис, объектыл куыд разæнгардæй архайынц, уый фенгæйæ. Кусджытæ йыл асфальтæй фыццаг цъар сæвæрдтой, бордюртæ дæр æвæрынц, фидар кæнынц Терчы былгæрæттæ, уæрæхдæр кæнынц цæугæдоны донвæд. Специалисттæ куыд зæгъынц, афтæмæй ног хид уыдзæн дзæвгар фидардæр зæрондæй. Йæ цæджындзтæ йын 18 метры фæбындæр кодтой, цæмæй йын дон-
ивылдтытæй тæссаг мауал уа, фылдæр транспорт ыл цæуа. Ныртæккæ хидыл кусынц 50 адæймаджы æмæ сæрмагонд техникæйы 30 иуæджы. Рæстæгæй иу уысм дæр сæфт нæ цæуы, цалынмæ цæст уына, уæдмæ архайынц, æмæ сын хорз æнтысы.
Нæхæдæг куыд федтам, афтæмæй ацы бонты специалисттæ хидыл Ногиры ‘рдыгæй райдыдтой зæххыл куыстытæ, Михайловскы ‘рдыгæй та, уæлдæр куыд фæбæрæг кодтам, афтæмæй, æвæрынц бордюртæ.
Объект цы подрядон организацийыл фæдзæхст у, уый хайы разамонæг Кокойты Эрик куыд зæгъы, афтæмæй хæстæгдæр бонты бавналдзысты хид асфальты фæстаг цъарæй æмбæрзын, стæй йыл сæвæрдзысты фæндаггон нысантæ, бахæсдзысты йæм ахорæнæй бæрæггæнæнтæ.
Республикæйы цæрджытæ хиды срæвдзмæ тынг кæй æнхъæлмæ кæсынц, уый тыххæй ма фæбæрæг кæндзыстæм, æрæджы цы тыхджын къæвдатæ æрцыд, уыдон кæцыдæр куыстытæ кæй фæкъуылымпы кодтой. Фæлæ, æппæт уыцы уавæртæм нæ кæсгæйæ, арæзтад цæуы нысангонд æмгъуыдтæм гæсгæ. Кокойты Эрик куыд фæбæрæг кодта, афтæмæй æнæхъæн мæй экскаватор æмæ бульдозер кусынц Терчы донвæды, уæрæхдæр æй кæнынц. Тынг лæмбынæг у сæ архайд, цæугæдоны цыд нæ уромынц, цæмæй дзы кæсагæн мæлынæй тас ма уа, уый тыххæй.
Дызæрдыггаг нæу, хид куы байгом уа, уæд Дзæуджыхъæумæ цæуæг транспортон гуылфæн кæй фæкъаддæр уыдзæн æмæ фæндæгтæ зынгæ æдасдæр кæй фæуыдзысты, уый. Уæ зæрдыл уын æрлæууын кæндзыстæм, объект национ проект «Инфраструктурæ цардæн»-ы фæлгæты кæй аразынц, уый. Куыстытæ та хъуамæ кæронмæ æрхæццæ уой 1 декабры.
ГАПБАТЫ Алетæ
