Цæгат Кавказы федералон зылды чысыл æмæ рæстæмбис амалхъомады минæвæрттæ архайдтой фыццаг информацион сессийы. Конд æрцыд Уæрæсейы Промышленникты æмæ амалхъомты цæдис æмæ раззагдæр информацион технологитыл хæст корпорациты фæрцы.
Сесси уыд Цæгат Ирыстоны, бацархайдтой йыл Промышленникты æмæ амалхъомты цæдисы регионты ‘хсæн координацигæнæн советы уæнгтæ. Ахæм хъуыддæгты руаджы хъуамæ регионты амалхъомты архайд фæхъомысджындæр уа. Фембæлды архайджытæ базонгæ сты нырыккон нымæцон фæрæзтимæ, амалхъомадон хъуыддæгтæ æмæ лæггæдтæ рæвдздæр кæнынимæ баст нысантимæ, кæрæдзиимæ ерысхъом уæвыны мадзæлттимæ.
Уæрæсейы Промышленникты æмæ амалхъомты цæдисы сæрдар Александр Шохин куыд фæбæрæг кодта, афтæмæй хъæппæрисы ахадындзинад бæрзонд у. «Раззаг-
дæр информацион размæ хоныны интернет технологиты корпорацитæ амалхъомты цурмæ рахастой, практикон фæндæттæ сахуыр кæныны фадæттæ, уымæй уæлдай ма – раззагдæр технологитæ куыстмæ бахæссыны хъуыддæгтæ дæр», – загъта цæдисы разамонæг.
Куыстдæтджыты регионалон иугонды правленийы разамонæг Хъодзаты Алан куыд радзырдта, афтæмæй ахæм сесситæ пайда хæссынц амалхъомтæн, се ‘хсæн рауад æргом ныхас. «Сæ бон уыд фарстатæ раттын, уæлдай æргом аздæхтой размæ хоныны интернет фадæттæм, практикон авналæнтæм, нымæцон лæггæдтæм, маркетинджы стратегимæ, рекламæйы хæрдзтæм, нырыккон технологитæм. Ахæм фæмбæлдтытæ фадат дæттынц фæлтæрддзинад рæгъмæ рахæссынæн, практикон уынаффæтыл æрлæууынæн, компаниты рæзтмæ æркæсынæн», – загъта Хъодзайы-фырт.
Нæ уацхæссæг
