Ацы бонты нæ республикæйы уазæгуаты ис делегаци Китайы Адæмон Республикæйæ. Паддзахадон уагдæттæ, промышленность æмæ ахуырады къабазы аст минæвары зонгæ кæнынц нæ регионимæ.
Сæ балцы рæстæг пайдаджынæй хардз кæнынц – бабæрæг кодтой Тауаситы Сослæнбеджы номыл аивæдты скъола. Ам ахуыргæнинæгтæ мæйы дæргъы нывтæ кодтой Китаимæ баст темæтыл, æмæ сæ хуыздæртæй арæзт æрцыд равдыст. Уазджытæ сабиты конд нывтимæ стыр цымыдисдзинадимæ базонгæ сты, бæрзонд аргъ скодтой æрыгон нывгæнджыты курдиатæн æмæ бахастой фæндон призтæ æмæ лæвæрттимæ конкурс саразын. Æмæ ма иу æхсызгон хабар – делегацийы уæнгтæ æппæты курдиатджындæр сывæллæтты хонынц Китайы сæрдыгон арт-лагерты ахуыртæ ацæуынмæ, уыимæ – бынтон лæвар. Скъола уазджыты зæрдæмæ тынг фæцыд, базонгæ сты сабиты ахуырадон процессимæ, лæмбынæг аныхас кодтой ахуыргæнджытимæ, æмæ кæрæдзийæ разыйæ баззадысты.
Уымæй уæлдай ма китайаг æмбæлттæ уазæгуаты уыдысты Дзæуджыхъæуы иуæндæсæм скъолайы дæр. Ацы ахуырадон уагдон та цæмæ равзæрстой, уый бæлвырд у – нæ горæты скъолатæй æрмæстдæр ам ахуыр кæнынц китайаг æвзаг. Скъоладзаутæн æхсызгон уыдис сæ зонындзинæдтæ бафæлварын, китайаг æвзаг мадæлон кæмæн у, уыдонимæ аныхас кæнгæйæ, фылдæр базонын, сæ бæстæйы фыссынад куыд равзæрд æмæ рæзыд, уый тыххæй.
Делегацийы уæнгтæн скъолайы равдыстой æнæпилотон объекттимæ кусæн кълас, стæй, ахуырдзаутæ спортивон секциты куыд архайынц, уый. Уæрæсейы сгуыхт артист, кафджыты къорды разамонæг Плиты Нодар та сæ базонгæ кодта нæ рæсугъддæр адæмон кафт «Симд»-ы сусæгдзинæдтимæ.
Раздæр Китайы Адæмон Республикæйы горæт Гуаньчжоу æмæ Дзæуджыхъæу бафыстой хæлардзинад æмæ æмгуыстады тыххæй меморандум, иннæ къахдзæф та уыдзæн æмархайд æмæ горæтты æфсымæрдзинад бафидар кæнын.
Ныр Цæгат Ирыстон æмæ Китайы цæрджытæ кæрæдзимæ фæхæстæгдæр уыдзысты, уымæн æмæ æрæджы Уæрæсе æмæ ацы азиаг паддзахады разамонджытæ граждæнтæн раттой æнæ визæтæй кæрæдзимæ цæуыны бар.
ГАПБАТЫ Алетæ
