Сæрмагонд æфсæддон операцийы архайджытæн нæ республикæйы цæрджытæ, куыстуæттæ, сæ бон куыд у, афтæ æххуыс кæнынц, знагыл фæуæлахиз уæвынмæ сæ бавæрæн хæссынц. Уыдоны рæнхъыты ис Дыгуры районы центрон рынчындоны коллектив дæр.
Сæ хъомысджын архайд рохуаты нæ баззад – медицинон уагдоны сæйраг дохтыр Лекойты Артуры бабæрæг кодтой Сæрмагонд æфсæддон операцийы ассоциацийы Цæгат Ирыстоны регионалон хайады æххæстгæнæг директор Туаты Артур æмæ ассоциацийы сæрдары уынаффæгæнæг Абайты Азæмæт. Сæ цыды сæр уыд кадджын æмæ æхсызгон – фронтæн æххуысмæ стыр æвæрæн кæй хæссы, æфсæддонтæн хъæугæ уавæртæ æмæ мадзæлттæ кæй аразы се сдзæбæх кæнынæн, бæрзонд профессионализм æвдисгæйæ, цæсгомджынæй кæй æххæст кæны йæ
хæстæ, уый тыххæй йæ ассоциаци схорзæхджын кодта майдан «За милосердие и помощь» æмæ Арфæйы фыстæгæй. Уымæй уæлдай ма Арфæйы фыстæджытæ Лекойты Артуры номыл æрбарвыстой Уæрæсейы хъазахъхъæгты цæдис æмæ Кавказы адæмты уæрæсейаг цæдис. Уый та ууыл дзурæг у, æмæ рынчындоны коллектив æмæ йæ разамонæджы лæггæдтæ сæрмагонд æфсæддон операцийы архай-джытæн ирдæй зынынц.
Лекойты Артур уазджытæн зæрдæ бавæрдта, дарддæр дæр уыцы куыст æнтыстджынæй кæй хæццæ кæндзысты, уымæй.
ГАПБАТЫ Алетæ
