Зындгонд куыд у, афтæмæй Дзæуджыхъæуы 13 октябры райдыдта зымæгон хъармгæнæн рæстæджы æмгъуыд. Горæты администрацийы куыд фехъусын кодтой, афтæмæй къæпхæнгай цалдæр бонмæ скусын кæндзысты æппæт хъармдæттæнтæ дæр.
Уыимæ, бæрнон чиновникты ныхасмæ гæсгæ, хъарм фыццаджы-фццагдæр лæвæрд æрцæудзæн хъомыладон, ахуырадон, медицинон æмæ æндæр социалон нысаниуæджы кусæндæттæм. Къæпхæнгай хъарм фæхæццæ уыдзæн бирæфатерон цæрæн хæдзæрттæм дæр. Ахæм архайд цæуы республикæйы районты дæр.
Дзæуджыхъæу æмæ, æмткæй райсгæйæ, республикæйы коммуналон хæдзарад зымæгмæ куыд цæттæ у, ууыл бæстон ныхас рауад, цæрæнуатон-коммуналон хæдзарады, артаг æмæ энергетикæйы министр Хъараты Тимур цы æмбырд сарæзта, уым. Дзуаппон докладтæ скодтой профилон ведомствæтæ æмæ энергетикон компаниты минæвæрттæ, нысангонд æрцыдысты фыццаградон архайды фарстатæ.
Дзæуджыхъæуы уавæрыл дзургæйæ, куыд загъдæуыд, афтæмæй компани «Водоканал»-ы радгæс къордтæ къуырисæры бавнæлдтой хъармдæттæнты централизацигонд хызæг скусын кæнынмæ. Боны дæргъы уал кусын райдыдтой æппæт хъармдæттæнтæн се ’мбисы бæрц (бахъæудзæн суткæйæ чысыл фылдæр, цæмæй системæ æппæт хъарутæй скуса).
Уыимæ, «Водоканал»-ы специалисттæ къæрцхъус æмæ цæттæ сты алыхуызон æнæнхъæлæджы коммуналон-аварийон цаутæм дæр, кæм бахъæуа сæ февнæлд, уырдæм æвæстиатæй цæудзысты.
Сæрмагондæй æрдзырдæуыд, зымæгмæ цæттæдзинады мадзæлттæ кæм фæкъуыхцы сты, уыцы объектты уавæрыл. Зæгъæм, Дзæуджыхъæуы 434 бирæфатерон цæрæн хæдзары абоны онг нæма райстой хъармгæнæн рæстæгмæ цæттæдзинады паспорттæ. Сæрмагонд къамис уыцы хæдзæртты уавæрмæ æркаст æмæ бæлвырд амынддзинæдтæ радта разамынддæттæг компаниты миæвæрттæн, цæмæй цыбырдæр æмгъуыдтæм аиуварс кæной æппæт бæрæггонд аиппытæ (уыдон баст сты, хæдзæртты мидæг цы хæтæлтæ цæуы, уыдонимæ) дæр. Уæвгæ, «Водоканал» хъарм бадæтдзæн, уыцы хæдзæрттæ централизацигонд системæмæ кæм иу кæнынц, уыцы бынæттæм дæр…
КАЛМАНТЫ Аслан
