Цæгат Ирыстоны хицаудзинады æххæстгæнæг оргæнты бæрнон кусджытæ архайдтой федералон ахуырадон программæ «Разамонæг кусджыты дæсныдзинад – регионалон командæты хъомысæн»-ы. Ивгъуыд сабаты Мæскуыйы цы æмбырд сарæзтæуыд, уым хыгъд æрцыдысты программæйы хатдзæгтæ, бæрæггонд æрцыдысты æнтыстджындæр регионалон командæтæ æмæ райрæзты ахадгæдæр проекттæ.
РЦИ-Аланийæ æмбырды архайæг уыдысты регионалон командæйы уæнгтæ: премьер-министр Дзанайты Барис, хъæууон хæдзарады министр Къусраты Алан, Цæгат Ирыстоны инвестицион райрæзты корпорацийы генералон директор Гугкаты Таймураз, Æрæфы районы администрацийы сæргълæууæджы фыццаг хæдивæг Махъоты Сослан, Промышленность æмæ инвестициты министрады хайады хицау Гаглойты Зæринæ æмæ Дзæуджыхъæуы администрацийы инвестицион архайды хайады хицау Къусраты Сæрмæт.
Ахуырты кæронбæттæн æмбырды Цæгат Ирыстоны командæ рæгъмæ рахаста регионы дарддæры инвестицион райрæзты проект. Презентаци амыдта Гугкаты Таймураз. Йæ ныхасмæ гæсгæ, проекты бындурыл дарддæр архайд цæудзæн сæрмагонд экономикон тæлм «Мамысон» æмæ иннæ цымыдисаг инвестицион программæтыл, Дзæуджыхъæу æмæ республикæйы фæзындзысты индустриалон æмæ аграрон парктæ… Цæгат Ирыстоны дарддæры инвестицион райрæзты пълантыл, специалистты хъуыдымæ гæсгæ, хорзæрдæм сахаддзæн регионы геостратегион бынатæвæрд, стæй йæ ахуырадон хъомыс æмæ кадрты цæттæдзинад. Иу ныхасæй, амынд программæйы сæйрагдæр нысан у райрæзын кæнын регионы нырыккон инфраструктурæ, республикæйы социалон-экономикон размæцыдæн ахъаз кæнын.
Президентон академийы экспертон къорды уæнгтæ хорз аргъ скодтой Цæгат Ирыстоны командæйы проектæн.
Пленарон æмбырды архайджытæ æркастысты иннæ регионты проекттæ æмæ программæтæм дæр, бахастой фæндæттæ æмæ фиппаинæгтæ, сæ фæлтæрддзинадæй фæхай кодтой командæтты минæвæрттæн. Ныхасы сæйрагдæр темæтæ баст уыдысты Уæрæсейы регионты инвестицион хъомыс бæрзонддæр кæнынимæ, бæстæйы фæзуатон райрæзты стратегиимæ.
Боны фæткы фарстаты фæдыл сæ хъуыдытæ загътой Президентон академийы ректор Алексей Комиссаров, Уæрсейы экономикон рæзты министр Максим Решетников, фæллой æмæ социалон хъахъхъæнынады министры хæдивæг Дмитрий Платыгин æмæ æндæр федералон министрадтæ æмæ ведомствæты бæрнон кусджытæ.
Федералон ахуырадон программæ «Разамонæг кусджыты дæсныдзинад – регионалон командæты хъомысæн» æххæстгонд цæуы Президент Владимир Путины амынддзиндæй, фадæттæ йын аразынц Президентон академи æмæ УФ-йы Экономикон рæзты министрад
РЦИ-Аланийы
Сæргълæууæг æмæ
Хицауады пресс-службæ
