Республикон онкологон диспансеры радон хатт арæзт æрцыд Гом дуæртты бон. Уыцы акцийы фæлгæты фæлтæрдджын онкологтæ, иннæ медицион кусджытæ æркастысты дæсгай адæймæгты æнæниздзинады уавæрмæ.
Уый тыххæй фехъусын кодта РЦИ-Аланийы Æнæниздзинад хъахъхъæнынады министрады пресс-службæ.
Министрады минæвар куыд фæбæрæг кодта, афтæмæй ахæм мадзал арæзт æрцæуы рæстæгæй-рæстæгмæ, йæ сæйрагдæр нысантæ сты онкологон низтæ сæ райдайæн къæпхæныл раиртасын æмæ уыцы карз низы ныхмæ профилактикон куыст.
Боны дæргъы æххуысхъуаг адæмимæ фембæлдысты, онкологийы къабазы чи кусы, уыцы специалисттæ: маммологтæ, химиотерапевттæ, хирургтæ æмæ иннæтæ. Уымæй уæлдай, кæмæн хъуыд, уыдоны æнæниздзинады уавæр раиртæстой нымæцон маммограф æмæ УЗИ-йы нырыккондæр аппаратыл.
Уыимæ, ацы бон диспансермæ æрбахуыдтой æрмæстдæр сылгоймæгты – хъыгагæн, адæмы рæсугъддæр æмæ буцдæр хайы минæвæртты дæр тынг хъыгдарынц онкологон низтæ. Уыцы æууæл хынцгæйæ, уынаффæ хаст æрцыд, цæмæй ацы хатты профилактикон мадзалы сæрмагонд æргом здæхт æрцæуа сылгоймæгты æнæниздзинадмæ.
Джихаты Стэллæ
