Æхсæнады æппæты ахсджиагдæр дæсныйæдтæ рагæй-æрæгмæ дæр уы-
дысты дохтыртæ æмæ ахуыргæнджытæ. Фæстаг дæсгай азты царды цы стыр ивддзинæдтæ цæуы, уыдон æнæзынгæ нæ фесты æнæниздзинад хъахъхъæнынад æмæ ахуырады къабæзтыл дæр. Бирæ хъастгæнджытæ ис медицинон кусджытæй, ахуыргæнджытæй, алцыдæр æхцайæ æлхæнгæ сси, зæгъгæ, ахæм хъуыды ныффидар адæмы зонды. Æмæ йын бындур дæр ис.
Фæлæ, кæй зæгъын æй хъæуы, фылдæр урсхалатджынтæ æмæ ахуыргæнджытæ зæрдæбынæй æххæст кæнынц сæ хæстæ, уарзынц сæ дæсныйад æмæ йын се ‘ппæт хъарутæ дæттынц, адæмæй та сты арфæйаг. Уыцы æцæг профессионалты рæнхъы ис дигорайаг æрыгон лæппу Хъабанты Давид дæр.
Давид, горæт Дигорайы дыккæгæм скъолайы ма куы ахуыр кодта, уæд йæхицæн скарста, дохтыр кæй уыдзæн, æмæ уыцы нысанмæ йæхи рагагъоммæ цæттæ кодта. Уыдис æм стыр цымыдисдзинад, фидæны йæ чи бахъæудзæн, уыцы æрдзон наукæтæм, архайдта скъола æмæ районы олимпиадæты æмæ æнæ хæрзиуæгæй никæд баззад.
Скъола фæуыны фæстæ Хъабанты лæппу йæ бæллицы фæстæ ацыд æмæ йæ ахуыр адарддæр кодта Цæгат Ирыстоны медицинон академийы дзæбæхгæнæн факультеты. Зæрдæргъæвдæй бавнæлдта, фидæны йæ йæ куысты цы зонындзинæдтæ æмæ фæлтæрддзинад бахъæудзæн, уыдон исынмæ. Уый фæстæ фæци ординатурæ æмæ, 2024 азы, терапевты диплом райсгæйæ, Давид фæллойадон фæндагыл æрлæууыд Дыгуры районы поликлиникæйы.
Участочы терапевтæн йæ хæстæ æнцон не сты – абон уый медицинæйы къабазы æппæты ахсджиагдæр æмæ бæрнондæртæй иу у.
Рæстæмбис нымадæй, Хъабанты лæппу бон медицинон æххуыс ратты 20 рынчынæн. Ам хъæуы зонындзинæдтæ, лæмбынæгдзинад, раст хатдзæгтæ скæнын æмæ
хъуыддаг аскъуыддзаг кæнын. Фылдæр рынчынтæ тыхсынц туджы бæрзонд æлхъывдадæй, ахсæн æмæ зæрдæйы низтæй, æндыснæгæй, азы ацы афон та уазал баййафæг адæм – сæ улæфæнтæй. Алы рынчынæн дæр ссары æмæ снысан кæны, хуыздæр ын чи фæахъаз уыдзæн, ахæм хостæ æмæ мадзæлттæ.
Участочы терапевты куыст æрмæст кусæн уаты бадын нæу – хъуамæ дохтыр зона рынчынимæ зæрдæйæ-зæрдæмæ аныхас кæнын, уым æрмæст зонындзинæдтæ нæ, фæлæ ма дзы адæймагдзинад дæр хъæуы. Æмæ уыцы миниуджытæй дæр Хъабанты Давид дзæвгар фæхайджын – ссары алы адæймагмæ дæр хицæн дæгъæл, раргом ын кæны йæ низы бындур. Йæ бон поликлиникæмæ цæуын кæмæн нæу йе ‘нæниздзинады уавæрмæ гæсгæ, уыдоны сæ хæдзары бабæрæг кæны, зæрдиагæй сыл баузæлы, уæлдайдæр – хистæр кары минæвæрттыл.
Кæд нырма æрыгон у, уæддæр Давиды дохтыры курдиат ирдæй разынд, æрмæст поликлиникæйы æнгом коллективы мидæг нæ, фæлæ царды дæр йæ бынат ссардта.
ГАПБАТЫ Алетæ
