Илциисæн цæгаткавказаг управленийы разамонæг Дзугаты Никъала кусæг балцы бабæрæг кодта Цæгат Ирыстон æмæ æппæт бардарæг ведомствæты разамонджытимæ скодта æмбырд. Баст уыд, 1 октябрæй уадзæн пункт «Уæллаг Ларс»-ы Уæрæсейы Хицауады уынаффæйæ электронон рад кæй скуыста, уыимæ.
Ныхасы архайдтой Уæрæсейы Транспорты министрады Арæнты сæрты уадзæн пункттæ нывыл кæныны паддзахадон политикæйы департаменты разамонæг Кокайты Михал, «Росавтодор»-ы, «Ространснадзор»-ы, Уæрæсейы Мидхъуыддæгты министрады бæрнон лæгтæ. Цæгаткавказаг управленийы разамонæг уæлдай
æргом аздæхта дыууæ хъуыддæгмæ.
Сæ иу – транспорты змæлд афтæ саразын, цæмæй уадзæн пунктмæ сæрмагонд лæууæн бынæттæй машинæтæ æмбæрцæй хæццæ кæной «Уæллаг Ларс»-мæ.
Иннæ – уадзæн пункты цыдæриддæр змæлд рауайы, уый архайджытæ хъуамæ кæрæдзи æмбарой, Уæрæсейæ æддæмæ цы транспорт хизы, уый бæлвырд кæной.
Кусæг балцы нысанмæ уыд, инспекцион-æркастыты ифтонггæрзтæ æрвитæг компани «Скансервис»-ы хицау Александр Красноперовимæ æмæ «Скантроник Системс»-ы директорты советы сæрдар Александр Наливаевимæ фембæлын æмæ хъуыддаджы ныхас бакæнын. Рæгъмæ рахастæуыд компанийы ифтонггæрзтæй регионы пайда кæныны, уæзæгтæ бæрæг кæныны, куыст æнæрынцойæ кæныны фарстатæ.
Илциисæн цæгаткавказаг
управленийы пресс-службæ
