Кировы районы ахуырадон кусæндæтты кадджын уавæры сбæрæг кодтой ирон литературæйы бындурæвæрæг Хетæгкаты Къостайы райгуырды 166 азы бон. Æнæхъæн къуыри рæвдауæндæтты æмæ скъолаты хъуысдысты нæ разагъды поэты æмдзæвгæтæ.
Зæрдæмæдзæугæ мадзал ацыд Хъахъхъæдуры астæуккаг скъолайы дæр. Бацæттæ йæ кодта ахуыргæнæг Цгъойты Лизæ йæ æртыккæгæмкъласонтимæ. Урокмæ бакæсгæйæ, адæймаджы зæрдыл æрбалæууыд ирон æмбисонд: «Кæй кой кæнынц, уый нæ амарди». Æмæ, æцæгæйдæр, скъоладзаутæ «Ирон фæндыр»-ы алæмæтаг рæнхъытæ куы кастысты, уæд мадзалы архайджыты бауырныдта нæ фыдæлты
куырыхон зонд.
Скъолайы директор Саламаты Светланæ ахуырдзауты æмæ сæ хъомылгæнджыты базонгæ кодта кадджын уазджытимæ: Æппæтдунеон æхсæнадон змæлд «Аланты Ныхас»-ы ирон æвзаг æмæ ахуырады комитеты сæрдар Бургалаты Заремæ, змæлды сылгоймæгты комитеты уæнг, Цæгат Ирыстоны адæмон артисткæ Хъулаты Земфирæ, змæлды Кировы районы хайады уынаффæдоны сæрдар Къубалты Солтан, Кировы районы ветеранты уынаффæдоны сæрдар Бедойты Феликс. Уыдонæй алчидæр йæ æвзонджы бонты базонгæ Къостайы сфæлдыстадимæ.
Дунейыл хъуыстгонд ахуыргонд Абайты Васо йæ рæстæджы афтæ загъта: «Адæмæн сæ номдзыд хъæбулты айсæн нæй. Фæлæ, зæгъæм, ирон адæмæн Къостайы айстæуыд, уæд уый кæуылты уæззау цæф уаид! Алы ирон дæр цас мæгуырдæр, æнамонддæр, миддунейæ афтиддæр фæуаид!»
Æвæццæгæн, диссаг никæмæ фæкæсдзæн, хъахъхъæдуйраг сабитæн Къостайы сурæт, йæ диссаджы рæнхъытæ сæ зæрдæты куы баззайой, уæд. Цæмæй афтæ рауайа, ууыл зæрдиагæй кусынц Цгъойты Лизæ æмæ иннæ ахуыргæнджытæ. Куыд аив, куыд зæрдæмæхъаргæ кастысты сабитæ «А-ло-лай», «Уасæг», «Скъолайы лæппу», «Æрра фыййау» æмæ иннæ æмдзæвгæтæ!
Æрбацæуæг уазджытæ сæ раныхæсты зæрдиаг арфæ ракодтой фæлтæрдджын ахуыргæнæгæн, скъолайы ра-
замонджытæн сæ скъоладзауты иттæг хорз цæттæдзинады, сæ сыгъдæг ирон дзыхыныхас æмæ сæ æгъдауы тыххæй. Бургалаты Заремæ Цгъойты Лизæйы схорзæхджын кодта «Аланты Ныхас»-ы координацион уынаффæдоны Арфæйы фыстæгæй.
Нæ гыццыл Ирæн, ирон адæмæн стыр Къоста у ныфсы хос. Æмæ Хъахъхъæдуры скъолайы райдайæн кълæсты ахуырдзаутæн сæ ахуыргæнæг сæ чысыл зæрдæты Къостамæ цы уарзондзинады арт ссыгъта, уый кæй никуыуал бамынæг уыдзæн, ууыл ис æууæндæн.
КЪУБАЛТЫ Аркади,
къамы: уазджытимæ
зæрдылдарынæн
