Уæрæсейы Адæмон иудзинады бон цыппæрæм ноябры хуымæтæджы нæ бæрæг кæнæм. Алыхуызон диныл хæст адæмыхæттытæ 1612 азы æрбамбырд сты иудзинады тырысайы бын, иумæйагæй фæуæлахиз сты знагыл. Паддзахад дихтæ нал уыд, ралæууыд дзы сабыр цард.
Ныр дæр нæ сæфтмæ бæллæг тыхтæ кæнынц паддзахады сабыр цардмæ ныхилыны куыст. Тох цæуы сæрмагонд æфсæддон операцийы фæзы. Æдасдзинад сæйрагдæр æууæл у æхсæнады æрвылбоны царды. Уый хынцгæйæ, бæрæгбоны мадзæлттæ ацы аз дæр Ирыстоны уæрæх нæ бæрæг кæндзысты. Мæздæ-джы районы ацы фарстамæ уæлдай æргом здæхт цæуы, стратегион нысаниуæг ын ис.
– Абон æдасдзинады фарстамæ уæлдай æргом здæхт цæуы, уымæн æмæ, дунейы уавæр ахсджиаг у. Нæ районы цы æфсæддон хæйттæ ис, уыдон арха-йынц сæрмагонд æфсæддон операцийы, уымæ гæсгæ адæмы, цардыуаджы объектты æдасдзинадмæ уæлдай æргом здахæм. Æппæт æфсæддон хæйттимæ дæр нын ис æнгом бастдзинад, зонæм, цæмæй тыхсынц, уый æмæ бизнесы кусджытимæ архайæм сæ сæххæст кæныныл. Хæстон хызтæ, алыхуызон хъæугæ кусæнгæрзтæй сæ ифтонг кæнæм. Нæ объекттæ хъахъхъæд цæуынц, цавæрфæнды сæвзæрд уавæрмæ дæр цæттæ стæм. Цард куыд æвдисы, афтæмæй ныхкъуырд раттæм, фыдбылыз не ‘руадзæм. Тæссаг уавæры кусæм, фæлæ, тæссаг уавæр куы сæвзæры, уæд хæдархайгæ гæрзты фæрцы фехъусын кæнæм цæрджытæн. Уæлдай хатт бадзурæм æмæ бафæрсæм, æдасдзинадыл дзуапп чи дæтты, уыдонмæ. Базонæм, цæмæй æййафынц цух, цæмæй сæм фæкæсын хъæуы, уый. Рæстæг æмæ афон нæ хынцгæйæ, нæ хъус æвæллайгæйæ дарæм æппæт фарстатæм дæр. Фыдбылызæй ныронг хызт кæй стæм, уый, фыццаджыдæр, не ‘фсæддонтæ, администраци æмæ районы цæрджыты иумæйаг архайды фæрцы у. Ирæттæ, уырыссæгтæ, хъуымыхъхъæгтæ, сомихæгтæ, туркæгтæ цæцæйнæгтæ, кæсгæттæ, цигайнæгтæ, мæхъæлæттæ, гагаузтæ, грекъæгтæ, къарейæгтæ – æнгом лæууæм кæрæдзимæ, æмæ, кæд алыхуызон диныл хæст стæм, уæддæр нæм ис иудзинад. Уый та ахсджиаг у æхсæнады царды, цавæрфæнды фарстайыл архайгæйæ дæр, – зæгъы районы администрацийы сæргълæууæг Гутнаты Геннади.
Быдырты кæронмæ фæхæццæ кæнынц афæ-дзы бæркад æфснайыны
куыстытæ, зæхкусджытæ фидæны хорæрзадæн æвæрынц бындур. Районы администрацийы сæргълæууæг нын бамбарын кодта, сæ архайды бæрæггæнæнтыл, æдасдзинады фæдыл арæзт мадзæлттæ æмткæй райсгæйæ, кæй ницы уыйас зынынц. Æрмæст, глонассæй цы техникæ пайда кæны, уыдоны куыст рæстæгмæ фæкъуылымпы вæййы.
– Мæздæджы районы цæры 70 адæмыхатты, кæрæдзиимæ быцæу кæныны сæр сæ никуы бахъуыд. Раздæр азты-иу Адæмон иудзинады бон уæрæх бæрæг кодтой, иумæйагæй архайдтой бæрæгбоны алыхуызон мадзæлтты: концерттæ æмæ равдыстыты, спортивон ерыстæ æмæ æркастыты. Хъæлдзæг æмæ-иу цымыдисæй арвыстой сæ бон. Ныр та – бонзонгæйæ, Уæрæсейы регионты адæм цы уавæрты цæрынц, уым ахсджиагдæр æдасдзинады фарста у. Уый хынцгæйæ, ацы бон арæзт цæудзысты бæрæгбоны мадзæлттæ дæр. Бирæ адæм кæм архайдзæн гом арвы бын, уыдон хуыздæр рæстæджытæм аргъæвдзыстæм. Зæгъдзынæн, нæ цæрджытæ адæмы æдасдзинад хъахъхъæныны мадзæлттæм æмбаргæ цæстæй кæй кæсынц, æрбалæууыдысты не ‘фсæддонты фарсмæ æмæ сын æххуыс кæнынц. Бузныг сæ дæн уымæй. Иудзинады бæрæгбон ацы хатт гом арвы бын нæ арвитдзыстæм. Куыд нысан кæнæм, афтæмæй бæрæгбон цæудзæн районы Культурæйы хæдзæртты, скъолатæ æмæ чиныгдæтты.
Æгас республикæйы цæрджытæн мæ зæрдæ зæгъы иудзинад, сабырдзинад, æнæниздзинад æмæ фæрныгад. Бæрæгбоны хорзæх уæ уæд! – арфæ кæны Гутнаты Геннади.
ХУЫБИАТЫ Ларисæ, авторы ист къамтæ
