Цæгат Ирыстоны Хетæгкаты Къостайы номыл паддзахадон университеты экономикæ æмæ разамынды факультеты студенткæйæн нысангонд æрцыд федералон номон стипенди.
Уый тыххæй «Рæстдзинад»-æн фехъусын кодта экономикæ æмæ ра-
замынды факультеты декан Геннадий Родионов.
Деканы ныхасмæ гæсгæ, Уæрæсейы экономикæ æмæ финансты къабазы хорз зындгонд у Анатолий Гавриленкойы ном. Уый у ацы къабазы кусæг фæлтæрдджындæр æмæ зындгонддæр специалисттæй иу, разамынд дæтты Финансон базарады фарстаты фæдыл федералон советæн, стæй æндæр ахадгæ структурæтæн.
Анатолий Гавриленко профессион ахуырады фарстатæй дæр иппæрд нæу, йæ рæстæджы снысан кодта сæрмагонд номон стипендитæ уæлдæр ахуыргæнæндæтты хуыздæр студенттæн.
Уыцы стипенди кæмæн саккаг кодтой, уыдонæй ныр иу у ЦИПУ-йы цыппæрæм курсы студенткæ Калоты Мелинæ. Ахæм хорзæх чызгæн лæвæрд æрцыд иттæг хорз ахуырад æмæ зæрдиаг наукон-иртасæн архайды тыххæй. Уыимæ, Мелинæ номон стипенди (10 мин сомы бæрцæй) исдзæн 2025-2026 ахуыры азы дæргъы. «Арфæ кæнæм Мелинæйæн, нæ зæрдæ йын зæгъы ноджы стырдæр æнтыстдзинæдтæ», – кæронбæттæны бафиппайдта Геннадий Родионов.
Нæ уацхæссæг
