Дзæуджыхъæуы сывæллæтты 1-æм поликлиникæйы бындурон цалцæг, зæгъæн ис, æмæ кæронмæ ахæццæ. Уый тыххæй йæ телеграм-каналы ныффыста РЦИ-Аланийы Хицауады Сæрдары фыццаг хæдивæг АТАРТЫ Георги.
Ацы медицинон кусæндоны агъуыст арæзт æрцыд 1973 азы. Кæй зæгъын æй хъæуы, бæстыхайы уавæр домдта бындурон рацарæзт. Æмæ ныр уыцы нысан æххæстгонд æрцыд. Подрядон организацийы бригадтæ кæрæй-кæронмæ раивтой агъуысты сæр, æппæт инженерон коммуникацитæ æмæ сантехникон ифтонггæрзтæ, саив кодтой бæстыхайы æддаг бакаст, сæвæрдтой дзы ног лифт. Уыимæ, специалисттæ сног кодтой вентиляцион системæ (уый фæстаг азты бынтондæр нал куыста).
«Медицинон кусæндоны сæйраг дохтыры курдиатмæ гæсгæ, цалцæджы проектмæ бахастам иуæй-иу ивддзинæдтæ. Уый фæрцы фæуæрæхдæр сты, дохтыртæ æмæ иннæ медицинон кусджытæ æххуысагур адæмимæ кæм æмбæлынц æмæ сын
хъæугæ процедурæтæ кæм кæнынц, уыцы кабинетты фæзуæттæ», – бафиппайдта Хицауады Сæрдары хæдивæг.
Подрядчик куыд фæбæрæг кодта, афтæмæй бæстыхайы мидæггаг куыстытæ ныридæгæн фесты, кабинетты æвæрын райдыдтой хæдзары дзаума æмæ медицинон ифтонггæрзтæ. Зæрдæ дарæн ис, хæстæгдæр рæстæг поликлиникæ йæ æвзонг пациенттæн ногæй лæггад кæныны кæй райдайдзæн, ууыл.
Ахæм бындурон цалцæджы куыстытæ кæронмæ фæхæццæ кæнынц горæты сывæллæтты 2-æм поликлиникæйы дæр (уый та æрбынæттон Къостайы проспекты)…
Дмитрий АСТАХОВ
