Ацы бонты Дзæуджыхъæуы йæ куыст кодта Цæгат Ирыстоны национ-культурон иугæндтæ æмæ кавказаг адæмты дзыллон форум «Иу бинонтау: хæлар æмæ æнгомæй». Мадзалы кадджын уазæг уыд РЦИ-Аланийы Сæргълæууæг Сергей МЕНЯЙЛО.
Форум саразыны хъæппæрис равдыста Уæрæсейы Адæмты ассамблеяйы регионалон хайад, йæ фарсмæ æрбалæууыдысты республикæйы хицаудзинады оргæнтæ æмæ профилон ведомствæтæ дæр. Фестивалы сæйрагдæр нысантæ уыдысты Уæрæсейы адæмты ’хсæн национ фидыд æмæ иудзинад хъахъхъæнын, удварны хæзнатыл æнувыд уæвын, алы адæмыхæттыты хæлардзинад æмæ æмархайд хъомысджындæр кæнын.
Сергей Меняйло бабæрæг кодта, национ-культурон иугæндты минæвæрттæ цы уæрæх равдыст-армукъа бацæттæ кодтой, уый.
Республикæйы Национ музейы раз фæзуатмæ æрбамбырд сты национ иугæндты уæнгтæ, форумы иннæ архайджытæ æмæ уазджытæ. Алкæцы национ æхсæнады минæвæрттæ дæр бацархайдтой сæ адæмы æгъдæуттæ æмæ культурæ равдисыныл, сæ экспозициты равæрдтой æрмдæсныты куыстытæ, чингуытæ, къамты альбомтæ, бæстæзонæн буклеттæ… Уыимæ, алкæцы тæрхæгыл дæр бынат разынд национ хæринæгтæн дæр. Алырдыгæй хъуыстысты ирон, уырыссаг, сомихаг, кæсгон, тæтæйраг æмæ иннæ адæмыхæттыты мелодитæ æмæ зарджытæ, фæсивæд æвдыстой сæ арæхстдзинад кафтæй.
Сергей Меняйло æмæ иннæ бæрнон кусджытæ æрзылдысты æппæт национ кæртытыл дæр, зæрдæбын ныхас акодтой, республикæйы цы бирæ национ-культурон æхсæнадтæ ис, уыдоны минæвæрттимæ.
– Цæгат Ирыстон иумæйаг хæдзар у бирæ адæмыхæттытæ æмæ алы динты минæвæрттæн. Нæ адæмы хъомысы сæйрагдæр бындуртæ сты национ хæдбындурдзинад æмæ культурæйы удварны хæзнатæ, кæрæдзийæн аргъ кæнын æмæ иудзинадыл æнувыддзинады миниуджытæ. Абон цы форумы архайæг стæм, уый фæрцы хъомысджындæр кæнынц нæ бирæнацион адæмы тых æмæ фæрныгдæр фидæнмæ тырнындзинад, – йæ раныхасы фæбæрæг кодта РЦИ-Аланийы Сæргълæу-
уæг.
Фембæлды архайæг уыдысты Цæгат Ирыстоны национ политикæ æмæ æддагон бастдзинæдты фæдыл министр Бæгъиаты Алан, культурæйы министр Гуыдиаты Батрадз, æхсæнадон змæлд «Нæ Ирыстон»-ы сæрдар Лагкуты Вячеслав, æндæр æхсæнадон иугæндтæ æмæ ведомствæты минæвæрттæ.
СЛАНТЫ Аслан
