Мадæлон æвзаджы уавæр уымæ æрцыд, æмæ не ‘хсæнады фыццаградон хæстæ систы национ æвзаг, национ хæдбардзинад бахъахъхъæнын æмæ рæзын кæнын. Фаронæй фæстæмæ нæ республикæйы кусы Ирон æвзаджы рæзты центр. Центры сæйраг хæс у культурæ, традицитæ æмæ, кæй зæгъын æй хъæуы, ирон æвзаг бахъахъхъæнын, куыд – индоевропæйаг æвзæгты мыггагмæ чи хауы, уыцы индоирайнаг æвзæгты ирайнаг къабазы æвæджиау æвзаг.
Мадæлон æвзаг бахъахъхъæныныл архайынц Хетæгкаты Къостайы номыл паддзахадон университеты (ЦИПУ-йы) ирон филологийы факультеты студенттæ, сæ декан Гуытъиаты Эльмирæйы разамындæй. Ацы аз Национ музейимæ сарæзтой зæрдæмæдзæугæ программæ «Нæртон балц». Ацы программæ здæхт у
Нарты кадджтæ ирон æвзагыл республикæйы скъоладзауты ‘хсæн парахат кæнынмæ. Зæгъын хъæуы уый, æмæ ивгъуыд аз октябры Национ наукон библиотекæйы равдыстой Хетæгкаты Къостайы уацмыстæ «Ирон фæндыр» æмæ «Фатимæ», англисаг æвзагмæ сæ ратæлмац кодтой ЦИПУ-йы ирон филологийы факультеты декан
Гуытъиаты Эльмирæ æмæ филологон зонæдты кандидат Карсанаты Еленæ. Ацы куыст, æнæмæнг, фæахъаз уыдзæн фæсарæйнаг ахуыргæндты æргом нæ зындгонд поэты сфæлдыстадмæ раздахынæн.
Нæ университет дарддæр кусы канд уæрæсейаг нæ, фæлæ ма фæсарæйнаг университеттимæ, фæнды нæ æмгуыстад кæнын. Афтæмæй, ацы аз Къостайы номхæссæг паддзахадон университет æмæ Ираны университеты ‘хсæн зонад æмæ культурæйы къабазы æмгуыстадыл сæххæст 10 азы. Дыууæвæрсыг æнтыстджын æмгуыстады фæстиуæгæн рацыд Хетæгкаты Къостайы «Ирон фæндыр» персайнаг æвзагыл, бакуыстой йыл нæ университеты студенттæ, ахуыргæнджытæ æмæ раззагдæр иранисттæ.
Хæлардзинады нысанæн ацы æмдзæвгæты æмбырдгонд нæ ирайнаг коллегæтæн балæвар кодта ректор Огъуаты Алан. Хъуыддаг конд æрцыд, ирон литературæйы бындурæвæрæг, номдзыд поэт, фыссæг Хетæгкаты Къостайы бюст байгом кæныны Алламе Табатабайы университеты, ЦИПУ-йы минæварады балцы рæстæджы. Зæгъын хъæуы уый, æмæ 2019 азы Цæгат Ирыстоны паддзахадон университеты дæр байгом кодтой персайнаг литературæйы зынгæ классик, поэт Абулкасим Фердоусийы бюст.
Ис зæгъæн, ЦИПУ-йы сæргълæууæг, ректор Огъуаты Аланимæ, уæрæсейаг-ирайнаг ахастдзинæдтæ бахъахъхъæнын æмæ сфидар кæныны хъуыдда-
джы ахсджиаг бынат ахсы. Хæрз æрæджы та Хетæгкаты Къостайы номыл паддзахадон университеты делегаци, йæ сæргъы – Огъуаты Алан, афтæмæй бабæрæг кодта Сомихы Республикæ, сæрмагондæй – уæрæсейаг-сомихаг университет. Йæ нысан уыд дывæрсыг æмгуыстад рапарахат кæнын.
Зæгъын хъæуы уый, æмæ ацы аз нæ университеты ректор Огъуаты Алан Арфæйы гæххæтт райста Уæрæсейы Федерацийы Президент Владимир Путинæй. Уый бузныджы ныхас æрвиты бæрзонд цæттæдзинадимæ специалисттæ цæттæ кæныны, зонадон-педагогон архайд æмæ бирæ азты æнтыстджын куысты тыххæй. Уыимæ ма, ЦИПУ-йы профессор Бзарты Руслан бузныджы ныхæстæ райста Уæрæсейы Президент Владимир Путинæй.
Милдзыхты Аэлитæ,
ЦИПУ-йы
ахуыргæнæг
