Зынаргъ æмбæстонтæ!
Зæрдиаг арфæ уын кæнын ирон адæмы ахадгæдæр æмæ уарзондæр бæрæгбæттæй иу – Уастырджимæ кувæн къуырийы фæдыл!
Мах ыл æмбæлæм бæрзонд æмæ рæсугъд æнкъарæнтимæ – баззад нын нæ кадджын фыдæлтæй, сси нæ удварны хæзнатæ æмæ адæмы æнæфæцудгæ иудзинады фидар бындур. Ацы бонты мах уæлдай тынгдæр æнкъарæм æнусты сæрты фæлтæртæ æмæ традициты бастдзинад, удæнцойдзинад æмæ æхсæнады цины уылæнтæй дзаг кæны алы хæдзар дæр нæ Ирыстоны.
Сыгъдæгзæрдæйæ кувæм Уастырджимæ æмæ дзы курæм æнæниз, сабыр цард нæ бинонтæн, хионтæн, нæ республикæйы, не стыр Райгуырæн бæстæйы цæрджытæн. Уæлдай зæрдиагдæрæй дзы курæм, цæмæй, ныртæккæ нæ Фыдыбæстæйы хæдбардзинад æмæ рæсугъд сомбоны сæраппонд сæрмагонд æфсæддон операцийы æхсарджынæй чи хæцы, нæ уыцы фæсивæдæн баххуыс кæнын, цæмæй уæлахизимæ, сæрæгасæй сæмбæлой сæ уарзон бинонтыл, кадимæ ахицæн кæной сæ размæ ‘вæрд ахсджиаг хæстæ. Сæ лæгдзинад æмæ удыхъаруйæ мах стæм сæрыстыр, сæ хæстон дæсныдзинад дæр нæ дисы æфтауы.
Зынаргъ хæлæрттæ, мæ зæрдæ уын зæгъы сабырдзинад æмæ царды нывылад, райсомы бонæй ныфсджын уæвын! Дунейы фарн зæгъæд, цæмæй, нæ уарзон Ирыстоны сæраппонд цы иумæйаг хъуыддæгтæ аразæм, уыдон алкæддæр арфæйаг уой, нæ адæмы æнгомдзинад æмæ хъару та алкæддæр уæнт нæ дарддæры зæрдæзæгъгæ размæцыды бындур!
Зынаргъ æмзæххонтæ!
Иу хатт ма уын зæрдиаг арфæ кæнын Иры кадджындæр бæрæгбон – Джеоргуыбайы фæдыл!
Нæ бæрæгбон ныл алкæддæр рæсугъд æмæ хъæлдзæгæй цæуæд! Мæ зæрдæ уын зæгъы, цæмæй уæ хæдзæрттæ уой бæркадджын æмæ фæрнæйдзаг, бинонтæ – æнæниз æмæ сæрæгас, уæ кæстæртæ та – фыдбылызæй хызт!
Амондæй хайджын ут æмæ уын Стыр Хуыцау æмæ Уастырджи ахъазгæнæг уæнт кæддæриддæр!
Сергей МЕНЯЙЛО,
Республикæ Цæгат Ирыстон-Аланийы Сæргълæууæг
