РЦИ-Аланийы Хицауады Сæрдары фыццаг хæдивæг Роман Батыршинæн кусæг фембæлд уыд республикæйы паддзахадон исбон æмæ зæххы ахастдзинæдты министр Тедеты Руслан æмæ экологи æмæ æрдзон фæрæзты министры хæстæ рæстæгмæ æххæстгæнæг Бæззаты Вадимимæ.
РЦИ-Аланийы Хицауады Сæрдары фыццаг хæдивæг куыд фæбæрæг кодта, афтæмæй министрадтæн сæ сæйрагдæр хæстæ сты РЦИ-Аланийы Сæргълæууæг Сергей Меняйлойы фæдзæхстытæ. Уымæй дарддæр – национ проекттæ æмæ паддзахадон программæтæ царды уадзыны нысантæ. Роман Батыршины хъуыдымæ гæсгæ, ацы ведомствæтæ хъуамæ фæтынгдæр кæной сæ архайд.
«Æрдзон фæрæзты ведомствæ хъуамæ æнæзакъон бырондæттæн кæрон скæна, рекультивацимæ бавнала. Уæдæ кæсагдарыны къабазы куысты бындуры бавæра закъонæвæрынадон акттæ. Исбонады министрадмæ хауынц зæххы фарстатæ, уым æнæмæнг сфидар кæнын хъæуы бæлвырд фæтк. Уыимæ – цыбыр рæстæгмæ», – загъта премьер-министры фыццаг хæдивæг.
Фембæлды архайджытæ бæстон æрдзырдтой æппæт ахсджиаг фарстатыл, зæгъæм, æрдзон фæрæзты министрад хъуамæ æнæмæнгæй бæрæг кæна æрдзон фæрæзтæй пайдагæнæн бынæттæ, аквакультурон объекттæ. Цæмæй алфамбылайтæн хæдзарадон архайдимæ куыстуæттæ къаддæр тæссагдзинæдтæ хæссой, уымæн фадæттæ аразой. Ныхас рауад цæрæнбынæтты санитарон уавæры тыххæй, рахастæуыд, «Экологон фæрныгад»-ы национ проектмæ гæсгæ зиутæ саразыны нысантæ.
Паддзахадон исбонады ведомствæйæн йæ размæ сæвæрдтой цифрон иумæйаг платформæ сæ архайдмæ бахæссыны хæстæ. Платформæ хуыйны «Фæлгæтон бæрæггæнæнты национ системæ», уый руаджы зæххы, æнæзмæлгæ исбоны, фæндæгты, инженерон хызты, административон арæнты, æндæр объектты бæрæггæнæнтæ иумæйаг информацион хызмæ æрбаиу уой.
Уæрæсейы æппæт субъекттæ хъуамæ ацы хъуыддаг царды рауадзой, фæзуатон зонæтæ, цæрæнбынæттæ, раздæр нымад чи æрцыд, уыцы исбонады хицæутты бартæ рабæрæг кæной æмæ сæ цифрон хуызмæ бахæссой. Уыдæттæн ис бæлвырд æмгъуыд: 2027 азы 1 январь. Цæгат Ирыстоны ацы куыст кæронмæ æрхæццæ, фæзуатон зонæтæ æрфыстой 100 проценты онг, цæрæнбынæттæ – 96,4 проценты онг, исбоны хицæутты бартæ рабæрæг кодтой.
Республикæйы районты куыст цæуы хаццоны уæвæг зæххы хæйттæй пайда кæныны фиддонтæ исыныл. Ивгъуыд къуыри республикон бюджетмæ æрбафтыд хаццоны уæвæг зæххытæй 16,7 милуан сомы.
РЦИ-Аланийы Сæргълæууæг æмæ Хицауады пресс-службæ
