Цæгат Ирыстоны Æфсæддон комиссарады цур байгом сæрмагонд æфсæддон операцийы тæлмы æбæрæгæй фесæфæг службæгæнджыты хъысмæт иртасыны центр. Ног структурæ арæзт æрцыд РЦИ-Аланийы Сæргълæу-
уæг Сергей МЕНЯЙЛОЙЫ хъæппæрисæй.
Центры размæ цы ахсджиаг нысантæ æвæрд цæуы, уыдоныл кусдзысты æфсæддон комиссарады специалисттæ æмæ бархионты сæрмагонд агурæн къорд «Своих не бросаем»-ы уæнгтæ.
Республикæйы Сæргълæууæг бабæрæг кодта æфсæддон комиссарад æмæ базонгæ центры куыстимæ.
Æфсæддон комиссар Владимир Скоморох куыд радзырдта, афтæмæй центры минæвæрттæ ныридæгæн кусын райдыдтой æбæрæгæй фесæфæг адæмы курдиæттимæ. Уыимæ, йæ ныхасмæ гæсгæ, ног структурæйы специалисттæ æппæт фарстаты фæдыл дæр æнгом æмархайд кæнынц РЦИ-Аланийы Сæргълæууæг æмæ Хицауады Администрацийы Адæмы курдиæттимæ куысты управлениимæ, фонд «Фыдыбæстæ хъахъхъæнджытæ»-йы регионалон хайадимæ, УФ-йы Хъахъхъæнынады министрады æфсæддон хæйтты командæгæнынад æмæ æндæр профилон ведомствæтимæ.
– Ахæм агурæн куыст кæнгæйæ, сæйрагдæр у, цæмæй æбæрæгæй фесæфæг æфсæддон службæгæнджытæ æмæ бархионты бинонтæ базоной рæстдзинад сæ хиуæтты хъысмæты тыххæй. Ахæм архайд ныронг дæр кодтам, фæлæ рæстæг куыд æвдисы, афтæмæй фарста æппæтвæрсыг æмæ вазыгджын у, æмæ растдæр уы-
дзæн, иу структурæйы бæрны йæ куы бакæнæм, уæд. Уыцы æууæлтæ хынцгæйæ, бауынаффæ кодтам амынд центр байгом кæныны тыххæй, – радзырдта Сергей
Меняйло.
Фембæлды архайджытæ æрдзырдтой центры куысты сæйрагдæр фæзилæнтыл, фæбæрæг кодтой фыццаградон нысантæ.
РЦИ-Аланийы Сæргълæууæг æмæ Хицауады пресс-службæ
