Сæрмагонд æфсæддон операцийы архайгæйæ, цæфтæ чи бавзæрста, уыдон се ‘нæниздзинад фидар кæнынц бæстæ хъахъхъæнынады министрады 412-æм хæстон дзæуджыхъæуккаг госпитæлы. Афтæ зæгъæн ис, æмæ цæф æфсæддонтæ сты дохтырты, медицинон хоты, æрбацæуæг адæмы æвджид.
Джеоргуыбайы къуырийы тæккæ райдайæны «Аланты Ныхас»-ы уæнгтæ – Фриаты Хъазыбег, Дзæгъойты Вячеслав, Дзекъойты Юри æмæ Къодоты Мэлс сæхицæн хæсыл банымадтой госпитæлы цæф æфсæддонты бабæрæг кæнын. Ацы балц сын, мыййаг, фыццаг хатт нæ рауад, фæлæ ныр Лæгты дзуармæ кувыны рæстæг æртæ уæливыхы, æртæ фæрсчы, бæгæны райстой æмæ цæф æфсæддонтæн скуывтой.
Скуывтой æмæ ракуырдтой Иунæг Кадджын Стыр Хуыцауæй, Лæгты дзуарæй, цæмæй дуне сабыр уа, сæрмагонд æфсæддон операцийы архайджыты бафæдзæхстой, сæрæгасæй сæ хæдзæрттыл куыд сæмбæлой, уыцы арфæтæ ракодтой. Уый фæстæ «Аланты Ныхас»-ы номæй Арфæйы гæххæттытæ
раттой хæстон госпитæлы медицинон кусджытæн – Аркадий Смольниковæн, Тотраты Керимбекæн, Саидæ Кулибековайæн, Аркъауты Линæйæн, Иннæ Дроздовайæн. Бузныг сын загътой, ацы ран стыр фыдæбон кæй кæнынц, рынчынты цардмæ кæй здахынц, уый тыххæй.
Ирон лæгæн йе ‘гъдау кæддæриддæр йæ разæй кæй цæуы, уый æмхуызонæй дæр зонæм, æмæ ныр дæр уазджытæ цæф æфсæддонтæн семæ æрбахастой æндæр хæлц дæр, ууыл бацархайдтой Дзекъойты Юри æмæ Къодоты Мэлс.
Уримæгты
Людмилæ,
«Аланты Ныхас»-ы бæрнон нымæрдар
