Дыууæ ахсджиаг цауы зæрдыл бадарыны охыл Алагиры 3-æм скъолайы ахуырдзаутæ бабæрæг кодтой Мидхъуыддæгты министрады историон
музей. Цаутæ бабастой Мидхъуыддæгты оргæнты службæгæнгæйæ, йæ хæстæ æххæстгæнгæйæ йæ цард чи ратта, уыдоны зæрдылдарæн бон æмæ Уæрæсейы Мидхъуыддæгты оргæнты бæрæгбонимæ.
Музей бабæрæг кæныны хъæппæрис равдыстой Алагиры районы мидхъуыддæгты хайады æнахъомты хъуыддæгты инспектор Сабанты Алинæ, Алагиры 3-æм скъолайы директоры уынаффæгæнæг Есенаты Альбинæ. Æппæт хъуыддæгтæ бантыстысты оперативон-профилактикон операци «Сыгъдæг фæлтæр – 2025»-ы фæрцы.
Хъæппæрисыл сразы ис районы мидхъуыддæгты хайады Ветеранты советы разамонæг, отставкæйы булкъон Бицъоты Олег. Афтæмæй 7-æм æмæ 9-æм кълæсты ахуыр-
дзаутæн сæ бон бацис республикæйы мидхъуыддæгты оргæнты историимæ базонгæ уæвын, суанг уæрæсейаг паддзахаддзинадæй – нырыккон рæстæгмæ.
Сывæллæтты размæ байгом сты дæсгай музейон залты дуæрттæ, уым бæстонæй фенæн уыд барадхъахъхъæнджыты фæндæгтæ. Экспозицитæ баст уыдысты алыхуызон историон цаутимæ, зæгъæм, Русьимæ, Аланиимæ бастдзинæдтæ, Ирыстоны мидхъуыддæгты оргæнтæ куыд фæзындысты, уыдæттæ. Ацы диссаджы историон балцы рæзгæ фæлтæры ахуыдта Мидхъуыддæгты министрады ветеран, запасы дæлбулкъон Медойты Тимур. Уый йæ цард снывонд кодта барадхъахъхъæнæг оргæнты историйæн, ныр дæр у музейы сæйраг удылхæцæг.
Тынг бирæ цымыдисаг хабæрттæ дзы фехъуыстой сывæллæттæ, Медойы-фырт дзырдта милицæйы, пъæлицæйы службæгæнджыты лæгдзинад æмæ æхсардзинады тыххæй. Историон æрмæджытæ сын æвдыста, барадхъахъхъæнджыты рæзты æппæт фæзилæнтæ дæр равдыста.
Уæлдай æргом аздæхтой милицæйы службæгæнджыты хъæбатыр-
дзинадмæ, Бицъоты Олег радзырдта Мецъаты Марк æмæ Челдыты Виталийы сгуыхтдзинæдты тыххæй. Уыдон сæ цард нæ бавгъау кодтой, фыдгæнджытæй нæ фæтарстысты. Мидхъуыддæгты службæйы ныууагътой арф фæд, се ‘мдугон уæвгæйæ сæ Бицъоты Олег схуыдта барады сæрыл æцæг тохгæнджытæ.
Тынг лæмбынæг æркастысты хæцæнгарзы коллекцимæ сывæллæттæ, се ‘хсæн уыдысты службæгæнджыты гæрзтæ æмæ фыдгæнджытæй кæй байстой, ахæм хæцæнгарз. Афтæ зæгъæн ис, æмæ ацы балц сабиты зæрдæты ныууагъта стыр æнкъарæнтæ, æнæфæцудгæ ахаст барадмæ, пъæлицæйы кусджытæ цы зындзинæдтимæ æмбæлынц, уыдоны сæрты куыд хизынц, уыдæттæм.
Гæззаты Зæринæ,
Алагиры районы
мидхъуыддæгты
хайады инспектор
