Цæгат Ирыстоны паддзахадон университеты экономикæ æмæ уынаффæйады факультеты студенттæ практикон ахуырад нæ республикæйы раззагдæр куыстуæтты цæмæй цæуой, уымæн фадæттæ сараздзысты.
Нæ республикæйы туризмы рæзгæ къабазæн хъæугæ специалистты куыд цæттæ кæндзысты, ууыл хъуыддаджы фембæлды рæстæг æрныхас кодтой регионы экономикон рæзты министры хæдивæг Хлойты Тамерлан æмæ амынд факультеты минæвæрттæ.
– Факультеты коллектив нын кæй бавдыста, уыцы фæндæтты фæрцы бæлвырд хъуыддæгтыл бафидыдтам. Факультеты студенттæ Ирыстоны раззаг туристон кусæндæтты бындурыл ахуырадон практикæ цæмæй цæуой, уымæн фадæттæ сараздзыстæм. Уæлдæр ахуыргæнæндон æмæ бизнесы æхсæн комкоммæ бастдзинад пайдайаг кæй уыдзæн, уый мæ уырны. Иумæйаг архайды фæрцы нæ республикæйы туристон индустрийæн дæсны специалистты бацæттæ кæндзыстæм, – загъта Хлойы-фырт.
Ахуырад æмæ туристон къабаз баввахс кæныны фæдыл куыст парахатæй цæуы. Нæ регионы экономикон рæзты министр Сокаты Марат ацы хъуыддагмæ стыр æргом здахы. Цæгат Ирыстон национ проект «Ахадгæ æмæ ерысхъом экономикæ» кæй æххæст кæны, уый руаджы нæ регионы туристон къабаз рæзы.
Геннадий Родионов,
ЦИПУ-йы экономикæ æмæ уынаффæйады факультеты декан
