РЦИ-Аланийы Сæргълæууæг Сергей МЕНЯЙЛОЙЫ амынддзинадмæ гæсгæ, республикæйы Хицауады Сæрдары фыццаг хæдивæг ОТАРТЫ Георгийæн кусæг фембæлд уыд акционерон æхсæнад «Россельхозбанк»-ы амалхъомады райрæзты цæгатирыстойнаг центры хицау МЗОКТЫ Олегимæ.
Фембæлды архайджытæ æрдзырдтой сæрмагонд æфсæддон операцийы архайджытæ æмæ сæ бинонтæн æппæтфадатджын æмæ асламдæр цæрæнуæттæ дæттыны республикон программæ æххæст кæныныл (зындгонд куыд у, афтæмæй ацы ахсджиаг фарстайыл ныхас рауад, 3 декабры Сергей Меняйлойæн регионы цæрджытимæ цы «комкоммæ бастдзинад» уыд, уым дæр).
Амынд программæйы уагæвæрдтæ фæбæстондæр æмæ йæ архайджыты нымæц фæуæрæхдæр кæныны нысанимæ фыццаградон æргом здæхт æрцæудзæн «хъæууон ипотекæйы» уагæвæрдмæ.
«Ныртæккæ республикæйы профилон ведомствæты размæ æвæрд цæуы регионы комплексон райрæзты пълантыл бæстон бакусыны хæс. Республикæйы хъæууон муниципалитетты арæзт цæудзысты, хи хæдзæрттæ кæм æрбынат кæндзысты, ахæм микрорайонтæ. Уыимæ, алкæцы микрорайоны дæр хæдзæрттимæ уыцы-иу рæстæг араздзысты æппæт хъæугæ социалон инфраструктурæ дæр: рæвдауæндæттæ, скъолатæ, медицинон кусæндæттæ, æхсæнадон фæлладуадзæн тæлмытæ æмæ афтæ дарддæр», – радзырдта Хицауады Сæрдары фыццаг хæдивæг.
Отарты Георгийы ныхасмæ гæсгæ, æппæт уыцы фарстатыл кусгæйæ, хицæн уагæвæрды бындурыл асламдæр цæрæнуæттæй ифтонггонд цæудзысты сæрмагонд æфсæддон операцийы архайджытæ æмæ сæ бинонтæ. Цæмæй уыцы нысан къухы бафта, уымæн хорз фæахъаз уыдзæн «Россельзозбанк»-ы ипотекон программæтæй спайда кæныны хъæппæрис. Уыимæ, фарста æвæрд цæуы, цæмæй, уыцы ипотекон программæты архайæг суæвгæйæ, пайдагонд æрцæуа льготон фæткæй.
Æппæт уыцы фарстатыл РЦИ-Аланийы Хицауад æмæ «Россельхозбанк»-ы регионалон структурæтæ иумæйаг хъарутæй бакусдзысты.
Ныхасы архайæг уыд Цæгат Ирыстоны арæзтад æмæ архитектурæйы министр Бетанты Марат дæр.
Дмитрий АСТАХОВ
