Цæгат Ирыстоны Журналистты цæдис снысан кодта æрвылазон преми «Рухстауæг». Уый фæдыл уынаффæ æхсæнадон иугонды правлени рахаста йæ радон æмбырды.
«Иуæй, бацархайдтам, цæмæй сног кæнæм кæддæры фæзминаг æгъдау æмæ цæдисы уæнгты хуыздæрты æрвылаз дæр хорзæхджын кæнæм сæрмагонд хæрзиуæгæй (фæстаг 30 азы дæргъы ахæм премитæ лæвæрд нал цыдысты). Иннæмæй та нæ фæнд у, журналистикæ æмæ рухстауæн куыстæн, æхсæнадæн зæрдиаг лæггадæн йæ цард чи снывонд кодта, нæ уыцы хистæр æмкусджытæн кад скæнын. «Рухстауæг» лæвæрд цæудзæн журналистты хистæр фæлтæры сгуыхт архай-джытæн», – радзырдта Журналистты цæдисы сæрдар, паддзахадон телерадиокомпани «Алани»-йы разамонæг Хъуысаты Тимур.
Правленийы уæнгтæ фехъусын кодтой ног премийы фыццаг лауреатты нæмттæ дæр. Афтæ, фыццаг преми «Рухстауæг» саккаг кодтой Дзæуджыхъæуы кадджын цæрæг, УФ-йы сгуыхт ахуыргæнæг, ССР Цæдисы паддзахадон премийы лауреат Биазырты Валентинæйæн, дыккаг преми – Цæгат æмæ Хуссар Ирыс-
тоны сгуыхт журналист, информацион агентад «Иринформ»-ы бындурæвæрæг Таболты Иринæ æмæ æртыккаг преми – газет «Моздокский вестник»-ы сæйраг редактор Сергей Телевнойæн.
Хæстæгдæр рæстæг лауреаттæ сæ премитæ кадджын уавæры райсдзысты.
Уыцы бон ма æмбырды архай-джытæ уыдысты иу æхсызгон цауы æвдисæн. Журналистты цæдисы уæнг суæвыны тыххæй æвдисæндар райста республикæйы национ ахастдзинæдтæ æмæ æддагон бастдзинæдты министр, Уæрæсейы Æфсæддон-историон æхсæнады цæгатирыстойнаг хайады сæрдар Бæгъиаты Алан.
«Рæстдзинад» арфæ кæны Журналистты цæдисы преми «Рухстауæг»-ы лауреаттæ æмæ æхсæнадон иугонды ног уæнгæн!
СЛАНТЫ Аслан
