Уæрæсейы Фæллой æмæ социалон рæзты, стæй Æнæниздзинад хъахъхъæнынады министрадты проекттæм гæсгæ Цæгат Ирыстоны Медицинон колледжы бындурыл ахуыртæ цæуынц фыццаг æххуыс бакæныны, стæй, дæргъвæтин рæстæг æххуыс кæй хъæуы, уыцы рынчынтæ æмæ æнæкуыстхъомтæм зилынæн специалисттæ цæттæ кæнынæй.
Бафиппайын хъæуы уый, æмæ дыккаг проект фæлварæны хуызы кæй æрцыд арæзт. Йæ хатдзæгтæм гæсгæ каст æрцыд, Уæрæсейы иннæ регионты дæр æм бафтаудзысты, æви нæ. Сæрмагонд æфсæддон операцийы рæстæг, уавæр хынцгæйæ, Уæрæсейы, уыимæ Цæгат Ирыстоны æхсæз районы ныр æртыккæгæм аз кусы ацы пилотон проект. Дзæуджыхъæуы, стæй Æрыдоны æмæ Мæздæджы районты цæуы архайд, дæргъвæтин рæстæг рынчын чи хæссы, уыдонæн, стæй æнæкуысхъомтæн сæрмагонд ахуырты
æххуысгæнджытæ цæттæ кæныныл. Бынæттон Медицинон колледжæн уал бантыст минмæ ‘ввахс адæймаджы бацæттæ кæнын.
– Ацы куыст бабар кодтой фæсдипломон ахуырады хайадæн. Йæ ахадындзинад фæбæрзонддæр сæрмагонд æфсæддон операцийы уавæрты, проект суыдзæн æппæтуæрæсеон, кусын ыл райдайдзысты нæ
республикæйы иннæ районты дæр. Бæрнон цæстæй кæсæм граждæнты ахуыр кæныны хъуыддагмæ, цæмæй проекты архайджытæ исой иттæг хорз зонындзинæдтæ, уæрæх дзы пайда кæной царды. Республикæйы Фæллой æмæ социалон хъахъхъæнынады министрад нæ куыстæй разы кæй у, уымæн æвдисæн, цы Арфæйы фыстæ-джытæ æмæ Кады гæххæттытæ райсæм, уый. Уыцы куыст æххæст кæндзыстæм дарддæр дæр, уымæн æмæ æхсæнады царды ахсджиаг у йæ ахадындзинад, куыдфæстæмæ та бæрзонддæр кæндзæн. Ныр пилотон проектæй сæрмагондмæ рахизыны рæстæг ралæууыд, – зæгъы хайады сæргълæууæг Мзокты Фиолетæ.
Кæй бафæнды, уыцы адæймæгтæй районты социалон æххуысады центрты саразынц къорд, æмæ сæ колледжмæ æрвылмæй æрвитынц ахуыртæм. Тесттæ фæрцы бæрæг кæнынц, кæмæ зилдзысты, уыдонимæ сæ ныхас сбаддзæн, æви нæ. Тесттæ саразыныл бакуыстой бынæттон психологтæ, ис дзы фондз хайы. Социалон службæйы кусджытæн æнгом бастдзинад ис дохтыртимæ, ахуыртæ та ацæуынц, суанг медицинон дæсныйад кæмæ ис, уыдон дæр. Каст сæ чи фæвæййы, уыдонæн кæронбæттæны лæвæрд цæуынц, федералон ахадындзинад кæмæн ис, ахæм æвдисæндартæ.
Дыууæ аз æмæ ‘рдæгмæ колледжы кусджытæ фыццаг медицинон æххуыс бакæныныл кæй сахуыр кодтой, уыдоны нымæц у 2900-мæ ‘ввахс. Федералон æмвæзады уынаффæ хаст æрцыд æмарæн Курскы, Белгороды районты æмæ Брянскы облæсты уавæрмæ гæсгæ. Цæгат Кавказы федералон æмæ Хуссайраг зылдты уыцы æххуыс бакæныны ахуыртæ хъуамæ ацæуой цæрджыты 60-70 проценты. Рахаст уынаффæмæ гæсгæ Цæгат Ирыстоны 27 колледжы студенттæ æмæ ахуыргæнджытæ, медицинон ахуырад кæмæ нæй, уыцы медицинон уагдæтты, вагзалтæ æмæ аэропорты мидхъуыддæгты линейон кусджытæ, скъолаты
хистæркъласонтæ, дуканиты æмæ транспорты кусджытæ ацыдысты ахуыртæ.
ХУЫБИАТЫ Ларисæ, авторы ист къамтæ
