Федералон паддзахадон бюджетон кусæндон «Заповедная Осетия-Алания» куыд фехъусын кодта, афтæмæй фарон нæ республикæйы
фæдзæхст территоритæ бабæрæг кодтой 36 мин адæймагæй фылдæр.
Уазджытæ нæм æрбацыдысты 140 экскурсийы фæткмæ гæсгæ, стæй, æрдз хъахъхъæнынады чи архайдта, бархионты æртæ ахæм лагеры фæрцы. Национ проект «Туризм æмæ уазæгуарзондзинад»-мæ гæсгæ кæй сарæзтой, уыцы мультимедион «Визит-центр» нымад у туристон инфраструктурæйы центрон фæзилæныл. Нæ регионы æвæджиауы æрдз канд фенын нæ, фæлæ ма йæ рахатын дæр кæй фæнды, уыцы мингай туристтæ æрбацыдысты «Визит-центр»-мæ.
Æрдзы пайдайæн æмгуыст кæнгæйæ, бархионтæ æмæ фæдзæхст бынаты кусджытæ сæдæгай сахатты дæргъы экологон къахвæндæгтæ арæзтой, территори æфснайдтой, стæй архайдтой наукон-иртасæн куыстыты. Уымæй уæлдай, фарон сарæзтæуыд 76 дзыллон мадзалы: фестивальтæ, экологон акцитæ, лекцитæ, компьютерон хъæзтытæ æмæ сфæлдыстадон ерыстæ.
Уæлдай фылдæр æргом здахынц фыдыбæстон туризмы райрæзтмæ. Фарон аст туристон маршруты сбæлвырд кæныны куыст æххæстгонд æрцыд. Маршруты бæлвырд координаттæ, йæ дæргъ, зындзинады къæпхæн, æдасдзинады тæлмытæ, афонон гæрæнтæ æмæ уагахасты фæтк кæм амонынц, алы туристон маршрутæн дæр раттой ахæм хи паспорт.
Саутæты Тамилæ
