Цæгат Ирыстонмæ кусæг балцы æрцыдысты æххæстгæнæг хицаудзинады федералон оргæнты минæвæрттæ. Балцы нысан у, Уæрæсейы Президент Владимир Путин æмæ бæстæйы Хицауады Сæрдар Михаил Мишустины фæдзæхстытæ бынаты æххæстгонд куыд цæуынц, уыимæ базонгæ уæвын.
Делегацийы сæргъы ис Уæрæсейы Хицауады Сæрдары æххуысгæнæг Муслим Хучиев, Культурæйы министрады, Доны фæрæзты департаменты, Цæгат Кавказы федералон зылды социалон-экономикон рæзты паддзахадон программæтæ царды уа-
дзыны департаменты бæрнон кусджытæ. Объектты уавæр мæскуыйаг уазджытимæ федта РЦИ-Аланийы Хицауады Сæрдар Дзанайты Барис.
Куыддæр уазджытæ Ирыстоны зæххыл æрлæууыдысты, афтæ уал дидинджытæ сæвæрдтой Беслæны «Зæдты горæт»-ы мемориалон комплексыл. Ацы ран ныгæд сты террористон фыдбæллæхы амæттæгтæ. Ацы аз хъуамæ уæлмæрдтæм базилой. Æппæт нысантæ Уæрæсейы Президент æмæ Хицауады Сæрдары уынаффæйæ хаст æрцыдыс-
ты республикæйы социалон-экономикон рæзты программæмæ.
Беслæны аивæдты скъолайы арæзтад дæр федтой, уыдзæн дзы 300 бынаты. Арæзтад æххæстгонд цæуы Беслæны рæзты Генералон пъланы бындурыл. Скъолайы уыдзæн ныв кæныны парахат кабинеттæ, равдыстыты залтæ, нырыккон ифтонггæрзтæ. Куыстытæ конд цæуынц графикмæ гæсгæ. Скъолайæн лæвæрд æрцыд 250 милуан сомæй фылдæр.
Уырдыгæй федералон бæрнон кусджытæ бацыдысты дунеон культурон-патриотон центр «Беслæн. 1-æм скъола»-мæ, байгом æй кодтой æрбабырсты рæстæг хæлд скъолайы бындурыл террористон акты 20 азы бон. Ныртæккæ дзы аразынц дыккаг уæладзыг, уым равæрдзысты 2004 азы цаутимæ баст экспозицитæ. Фыццаг къæпхæны сарæзтой уынджы фæзуат, бацæуæнтæ сифтонг кодтой, центры кусджытæн сарæзтой кабинеттæ, ис дзы бирæфадатджын зал. Æрбацæуæг адæмы бон у тематикон залтæ бабæрæг кæнын.
Арæзтады дыккаг къæпхæн кæронмæ ахæццæ уыдзæн 2026 азы майы кæрон. Ныртæккæ центры кусджытæ скъолайы фæлгонцыл архайынц, витринæтæ æвæрынц, хъæугæ хъæдын дзаума, мультимедийон æмæ сервисæн хъæугæ ифтонггæрзтæй дзаг кæнынц залтæ. Делегаци залтæ бабæрæг кодта, центры директор Сохиты Ларисæ сын æппæт хабæрттæ радзырдта. Ацы ран фембæлдысты «Беслæны мадæлтимæ». Террористон æрбабырсты фæмардуæвджыты хиуæттæн Муслим Хучиев загъта, трагедийы амæттæгты рох кæнæн кæй нæй, уый иумæйаг рыст кæй у, уыдæттæ.
Дзанайты Барис куыд радзырдта, афтæмæй ацы центр арæзт æрцыд федералон министрадтимæ æмгуыстады фæрцы. Ацы ран хъахъхъæд æрцæудзысты фыдбæллæхы æппæт цаутæ. «Бузныг уын уыцы æмгуыстады тыххæй. Экспозицитæ аразгæйæ, фыццагдæр нымад æрцæуынц беслæйнæгты хъуыдытæ, хатдзæгтæ, уыдон сæхæдæг бавзæрстой æппæт уыцы цаутæ», – загъта Хицауады Сæрдар.
Центры фæзуаты цы аргъуан ис, уырдæм дæр уазджытæ бацыдысты. Уымæй уæлдай, федтой, Терчы рахиз фарс былгæрæттæ куыд фидаргонд цæуынц, уый. Хъуыддæгтæ куыд æнтысынц, уый тыххæй радзырдта æрдзон фæрæзты ведомствæйы ра-
замонæг Бæззаты Вадим. Нысантæ æххæстгонд цæуынц, Уæрæсейы Хицауад кæй сфидар кодта, уыцы социалон-экономикон рæзты программæмæ гæсгæ.
РЦИ-Аланийы
Сæргълæууæг æмæ
Хицауады
пресс-службæ
