Æрыдоны йæ тыхы бацыд «Разамонæг командæты скъола». Уæрæсейы фыццаг чи у, уыцы «Зонынады академи» байгом кодта рухстауæн аз.
Цæгат Ирыстоны куыст цæуы ахуырады къабазы ног разамонджыты фæлтæр бацæттæ кæныныл. Уый кадджын уавæры байгом 4-æм лицейы уæрæсейаг æхсæнад «Зонынад»-ы бындурыл. Æрæджы йын лæвæрд æрцыд «Зонынады академи»-йы ном æмæ сси фыццаг, рухстауæг æхсæнады номхæссæг ахуырадон уагдон нæ бæстæйы.
Рухстауæн аз райдыдта Æрыдоны районы педагогон коллективты дæсныйад фæбæрзонддæр кæныны программæйæ. Кадджын мадзалы раныхас кодта Цæгат Ирыстоны Хетæгкаты Къостайы номыл паддзахадон университеты ректор, æхсæнад «Зонынад»-ы цæгатирыстойнаг регионалон хайады сæрдар Огъуаты Алан.
– 2026 аз æхсæнад «Зонынад»-æн Цæгат Ирыстоны райдыдта къорд ахсджиаг цауæй. Уыдон сты стыр æнтыстдзинæдтæ уæрæсейаг æхсæнад «Зонынад»-ы куыс-
тæн нæ республикæйы. Мах цæттæ кæнæм ног рухстауæн фæзуат. Уыимæ, хъуыдыгонд цæудзысты ахуыргæнинæгты фæндæттæ, æмæ сын лекцитæ чи кæсдзæн, уый дæр. «Зонынад»-ы рæзт, æппынæдзухæй районты архайгæйæ, – стыр бавæрæн у канд зонынæдтæм нæ, фæлæ нæ республикæйы нывылад æмæ экономикон фидæнмæ дæр, – загъта университеты разамонæг.
Мадзалы зынгæ архайдыл банымайæн ис Æрыдоны районы уæрæсейаг æхсæнад «Зонынад»-ы бынæттон хайад саразыны тыххæй документты бафыст. Куыд фе-
хъусын кодтой, афтæмæй хайады сæйраг архайд цæудзæн «Зонынады академи»-йы фæзуаты. Ныридæгæн уал фыццаг ахуыртæ скодтой политологон наукæты кандидат Сæлбиты Людмилæ æмæ Кадрты рæзт æмæ цæттæгæнæн институты ректор Гаджиты Аланæ.
Семинары фæлгæты архайджытæ æрныхас кодтой сæйрагдæр темæтæ: «Уæрæсейы фидæн» æмæ «Ахуырадон уагдоны командæйыл разамынд»-ыл. Уæлдай цæстдард проекты цæуы практикон архайдмæ: разамонджыты ’хсæн кæрæдзийæн фæлтæрд-
дзинадæй хай кæнынмæ.
Скъолайæ «Зонынады академи» саразын æмæ ахуыргæнджыты методикон æххуысы проект байгом кæныны фæндон бахаста Æрыдоны районы Ахуырад, фæсивæдон политикæ æмæ спорты комитет. Æрыдоны проект æнтыстджын къахдзæфтæ кæй акодта, уый йын фадат дæтты иннæ муниципалитетты дæр æй саразынæн. Уыцы архайд цæудзæн Кадрты рæзты æмæ цæттæ кæныны институты æххуысæй.
Мария Теплинская
