2025 азы Цæгат Ирыстоны дзыллон диспансеризацийы мадзæлтты архайдтой 260 мин адæймагæй фылдæр. Ахæм нымæцтæ фехъусын кодта РЦИ-Аланийы Æнæниздзинад хъахъхъæнынады министрады пресс-службæ.
Амынд медицинон цæстдарды мадзæлтты фæрцы адæймаджы æнæниздзинады уавæр раиртасæн ис, рагагъоммæ рахатын бантысы, йæ буар цавæр низтæм æмхиц у, куыд ис хи бахъахъхъæнæн алыхуызон уæвгæ рынтæй.
Дзыллон диспансеризацийы мадзæлттæ æххæстгонд цæуынц æппæт уæрæсейаг регионты дæр. Цæгат Ирыстоны Æнæниздзинад хъахъхъæнынады министрады минæвары ныхасмæ гæсгæ, ахæм медицинон цæстдарды мадзал арæзт цæуы, адæймаг кæм цæры, уыцы муниципалитеты территорион поликлиникæйы. Уыимæ, диспансеризацийы фæткмæ хаст дохтырты лæггæдтæ сты лæвар.
Фæстаг рæстæг диспансеризацийы куыстыл хæст сты, республикæйы цы
цæугæ медицинон комплекстæ ис, уыдоны бригадтæ дæр. Уыцы комплексты фæрцы чысыл горæттæ æмæ дæрддзæф хъæуты цæрджытæн вæййы флюорографийы, маммографийы, ЭКГ æмæ æндæр медицинон раиртæстытæ саразыны фадат. Комплексы бригады та вæййынц терапевт, офтальмолог æмæ æндæр специалисттæ.
Профилон министрады куыд фæбæрæг кодтой, афтæмæй 2026 азы республикæ самал кæндзæн ноджыдæр ма 11 ахæм цæугæ медицинон комплексы. Уымæн ахъаз у фыццаградон национ проект «Дæргъвæтин æмæ зæрдæзæгъгæ цард».
Дзыллон диспансеризацийы фæткы тыххæй бæлвырддæр хабæрттæ базонæн ис территорион поликлиникæйы, кæнæ та Æнæниздзинад хъахъхъæнынады министрады «комкоммæ бастдзинады» хæтæлмæ ахæм номырæй +7 (8672) 33-33-05 бадзургæйæ.
СЛАНТЫ Аслан
