Цæгат Ирыстоны Хицауады хæдзары цы æхсызгон фембæлд сарæзтæуыд, уым Сергей МЕНЯЙЛО РЦИ-Аланийы Сæргълæууæджы премитæй бархионты змæлды райрæзтимæ бастæй схорзæхджын кодта ног лауреатты.
Фембæлды райдайæны республикæйы Сæргълæууæг бузныг загъта æппæт волонтертæн дæр, æхсæнады пайдайæн цы вазыгджын хæрзаудæн куыст кæнынц, уый тыххæй. Йæ ныхасмæ гæсгæ, бархионты змæлды уæнгтæ сыгъдæгзæрдæйæ балæууынц æххуысхъуаг адæмы фарсмæ, æххæст кæнынц бирæ ахсджиаг социалон проекттæ. Алкæцы бархион дæр, зæгъæн ис, тырны алфамбылай дуне рæсугъддæр æмæ фæрныгдæр скæнынмæ.
– Бархионты змæлды райрæзты къабазы сгуыхтдзинæдты тыххæй РЦИ-Аланийы Сæргълæууæджы премийы сæйрагдæр нысан у сымахæй алкæмæн дæр аккаг аргъ скæнын æмæ бузныг зæгъын, æхсæнады лыггæнинаг фарстатæм къæрцхъус кæй стут, уæ рæдау æххуысæй тыхст адæмы зæрдæтæ кæй барухс кæнут, уый тыххæй. Ныфс мæ ис, уæ дарддæры социалон хъæппæристæ æмæ проекттæ дæр æхсæнады пайдайæн кæй уыдзысты, уымæй. Сымах архайд, æнæмæнг, иннæтæн дæр цæвиттойнаг у, – бафиппайдта Сергей Меняйло.
Уый фæстæ лауреаттæ райстой сæ дипломтæ.
Афтæ, номинаци «Хуыздæр бархион иугонд»-ы преми саккаг кодтой автономон æнæкоммерцион организаци «Фæсивæды æппæтвæрсыг райрæзты центр «Мах иумæ стæм»-æн.
«Бархионты иугонды хуыздæр разамонæг»-ы номинацийы преми райста автономон æнæкоммерцион хæрзаудæн иугонд «Зæды сыгъзæрин къухтæ»-йы регионалон координатор Людмилæ Храбрых.
«Бархионты змæлды хуыздæр архайæг»-ы номинацийы та преми лæвæрд æрцыд Æппæтуæрæсеон адæмон фронты фæсивæдон хайады регионалон координаторы хæдивæг, тактикон цæттæдзинады центр «Архангел»-ы инструктор Хæмыцаты Давидæн.
РЦИ-Аланийы Сæргълæууæг æмæ Хицауады пресс-службæ
