Цæгат Кавказы æрыгон ахуыргæндты инновацион проектты равдыст ныр
20-æм хатт цыдис Кæсæг-Балхъары паддзахадон университеты. Скъоладзаутæ, фæлтæрдджын ахуыргонд адæм, Цæгат Кавказы федералон зылды фондз регионы минæвæрттæ бацæттæ кодтой æмæ равдыстой сæ æнтыстдзинад.
Куыстытæн аргъ кодтой сæрмагонд къамис, баст уыдысты техникон æмæ информацион, стæй социалон-гуманитарон наукæтимæ. Равдыст кадджын уавæры байгом кодтой студентты центр «Альта»-йы. Студенттæ æмæ аспиранттæ бацæттæ кодтой проекттæ биологийæ, медицинæйæ, робототехникæ, дизайн æмæ архитектурæйæ. Дисы æфтыдтой инновацион аграрон кусæнгæрзтæ, æнæ сæкæрæй конд хойраджы продукттæ æмæ иртасæн куыстæн наукон прибортæ.
Равдысты сæрæнæй бацархайдтой Цæгат Ирыстоны паддзахадон университеты студенттæ дæр. Зæгъын хъæуы уый, æмæ ирыстойнаг секцимæ стыр цымыдис æвдыстой равдысты архайджытæ иууылдæр: фыццаджыдæр, æппындæр сæкæр кæдæм нæ хæццæ кæны, ахæм алывæрсыг пайдахæссæг мармелад. Дыккаг продукт – дзæбæхгæнæн – профилактикон, дыргътæ æмæ халсартæй конд хълапи æмæ, цыбыр рæстæгмæ чи ацæттæ уыдзæн, ахæм хъæрмхуымппы концентрат. Уыдон цæттæгæнгæйæ, пайда кодтам æрмæст хæрзхъæд продукттæй æнæ сæкæрæй, стабилизатортæ æмæ консерванттæй. Уымæ гæсгæ алы кары адæмæн æрмæстдæр пайда хæссынц, хорз фæзындзысты сæкæрнизæй рынчынты æнæниздзинадыл дæр.
Кæд фыццаг хатт архайдтам ахæм уæрæх равдысты, уæддæр æмбæлгæ хуызы равдыстам Ирыстон æмæ нæ университетæн скодтам кад.
Фембæлдыстæм дзы бирæ зындгонд æмæ цымыдисаг адæмтыл, кæрæдзийы фæлтæрддзинадæй фæхайджын стæм. Сæ фарстытæн сын дзуапп радтам. Æппæтуæрæсеон конкурсты архайыны аккаг кæй сты нæ куыстытæ, уымæй нын ныфсытæ бавæрдтой. Кæсæг-Балхъары паддзахадон университеты ректоры хæстæ æххæстгæнæг Юри Альтулдовы ныхасмæ гæсгæ, равдысты сæйраг нысан у æрыгон ахуыргæндтæн, иртасджытæн равдисын, сæ хъæппæристæ хъæугæ кæй сты, пайда кæй æрхæсдзысты нæ бæстæйы æмæ регионы экономикæйæн.
Равдысты уæлахиздзаутæ систы 27 адæймаджы. Раттой сын дипломтæ «Хуыздæр инновацион проект», «Хуыздæр хъæппæрис», «Хуыздæр презентаци» æмæ æндæр номинациты.
Æнæмæнгæй, инновацион проектты XX-æм равдыст баиу кодта курдиатджын фæсивæд, амалхъомад æмæ паддзахадон структурæты.
Цæгæраты Еленæ,
ЦИПУ-йы наукон разамонæг
