Дзæуджыхъæуы Нотон-музыкалон чиныгдоны кадджын уагæй байгом кодтой æрыгон нывгæнджыты равдыст «Графикæ».
Экспозици кæй баиу кодта, уыцы цыппæрдæс авторы каст фесты Цæгат Ирыстоны паддзахадон университеты аивæдты факультет, Дзæуджыхъæуы Дзанайты Азанбеджы номыл аивадон училищæ æмæ Бетъырбухы Илья Репины номыл аивæдты академи. Равдысты æдæппæт æрæвæрдтой алыхуызон графикон мадзæлттæй æххæстгонд сæдæ куыстæй фылдæр.
Проект банымайæн ис иумæйаг сфæлдыстадон куысты бæрæггæнæныл. Равдыст саразыны хъуыды сæвзæрд æнæнхъæлæджы уагæй: кæрæдзиимæ рагæй зонгæ нывгæнджытæ сæ аивад баиу кæныны æмæ хи куыстытæ æвдисынæн скодтой иумæйаг аивадон тыгъдад саразыны фæнд. Æппæт уацмыстæ конд сты иумæйаг уагæй, æмæ уый фæрцы адæймагæн ис сæйраг æргом хахх, стъæлф, кæнæ композицимæ аздахыны æмæ афтæмæй графикæйы æвæджиауы гæнæнтæ раргом кæныны фадат.
Равдыстмæ æрбацæуæг аивадуарзджытæ экспозицийы æвæрд мидисджын куыстытæй райгонд сты.
– Бирæ адæм равдыстмæ кæй æрбацæудзæн, уый æнхъæл нæ уыдыстæм. Ног курдиатджын нывгæнджытæ нæм цæмæй фæзыной, уый мæ фæнды, – зæгъы ЦИПУ-йы аивæдты факультеты студенткæ Джиоты Камиллæ.
21 мартъийы онг цы равдыст уыдзæн, уый фенæн ис алы адæймагæн дæр.
Нæ уацхæссæг
