РЦИ-Аланийы Хицауады радон æрвылкъуырион аппаратон æмбырд амыдта республикæйы Сæргълæууæг Сергей МЕНЯЙЛО. Республикæйы
оперативон уавæр æмæ æндæр ахсджиаг фарстатыл ныхас кодта министрадтæ æмæ ведомствæты разамонджытимæ, районты хиуынаффæйады администрациты сæргълæуджытимæ.
Хицауады Сæрдары хæдивæг Томайты Ирбег йæ доклады фехъусын кодта республикæйы оперативон уавæр.
– Ивгъуыд къуырийы дæргъы Цæгат Ирыстоны æппæт сæрмагонд службæтæ дæр архайдтой æрвылбоны цæттæдзинады уавæры. Цæгат Ирыстоны автоинспекцийы хъусынгæнинагмæ гæсгæ, республикæйы фæндæгтыл æрцыд 82 фæндаггон фыдбылызы. Хъыгдард дзы баййæфтой 17 адæймаджы, иу адæймаг дзы фæмард. Республикæйы хæххон районты тæссаг у зæйтæ рацæуынæй. Амынд къуырийы дæргъы хæхты йæхи æгъдауæй рацыд иу зæй. Афæдзы райдайæнæй нырмæ сæхи æгъдауæй рацыдысты 31 зæйы. Хъыгдард дзы ничи баййæфта. Боныхъæды аххосæгтæм гæсгæ, Арвыкомы фæндаг ныртæккæ æхгæд у уæзласæн машинæтæн. Транскамы фæндагыл ацæуыны бар ис автотранспорты хуызтæн æппæт дæр. Республикæйы фæндæгтыл лæууы 2826 транзитон уæзласæн машинæйы, 2655 та – электронон рады. Уæрæсейы Федераци æмæ Гуырдзыстоны арæныл уæлдæр амынд рæстæгмæ дыууæрдæм ахызтысты 7 мин автотранспортон иуæджы æмæ 15 мин адæймагæй фылдæр, – загъта Томайы-фырт.
РЦИ-Аланийы Мидхъуыддæгты министрады хъусынгæнинагмæ гæсгæ, нæ республикæйы ахуырадон уагдæттæм дзурынц æбæрæг фыдгæнджытæ, рæмудзæн æрмæг дзы ис, зæгъгæ. Мидхъуыддæгты оргæнтæ æмæ Æнæнхъæлæджы уавæрты министрад, æппæт хъæугæ оперативон мадзæлттæ саразгæйæ, сбæрæг кодтой, уыцы хъусынгæнинæгтæ мæнг кæй сты, уый. Цæуынц слестгæнæн мадзæлттæ.
Сергей Меняйло республикæйы Цæрæнуатонкоммуналон хæдзарад, артаг æмæ энергетикæйы министрадæн бафæдзæхста, хъармгæнæн рæстæг куыд цæуы, уый сбæрæг кæнын, цæмæй æмбарæм, иннæ хъармгæнæн рæстæгмæ нæ цавæр ма-
дзæлттæ бацæттæ кæнын хъæуы, уый.
«Роспотребнадзор»-ы Цæгат Ирыстоны хайады хъусынгæнинагмæ гæсгæ, республикæйы эпидемиологион уавæр у нывыл. Медицинон уагдæттæм æххуысмæ чи бадзуры, уыцы адæмы нымæц зынгæ фæкъаддæр. Ивгъуыд къуыри коронавирусон инфекци разынд 11 адæймагмæ.
Ахуырад æмæ наукæйы министр Алыбегты Эллæйы ныхасмæ гæсгæ, нæ республикæйы æппæт ахуырадон уагдæттæ дæр кусынц æрвылбоны фæткыл. Грипп æмæ ОРВИ-йы аххосæй æхгæд æрцыдысты дыууæ къласы. Скъолаты рынчын сывæллæтты нымæц у 10 проценты, рæвдауæндæтты та сæ нымæц хæццæ кæны 14 процентмæ.
Республикæйы «Водоканал» куыд фехъусын кодта, афтæмæй, цалынмæ Æрæфы районы ног донуадзæн скуса, уæдмæ уал цæрджытæ пайда кæнынц зæронд хæтæлæй. Специалисттæ иудадзыг хæтæлты уавæрмæ сæ цæст дарынц, кæм сæ æмпъузгæ бакæнынц, кæм та – ивгæ.
Цæхæрадæтты æмбалад «Иристон»-ы цæрджытæ хъаст кæнынц, фæндæгты уавæр нывыл кæй нæу, уымæй. Сергей Меняйло Дзæуджыхъæуы администрацийæн бахæс кодта йе ’ргом ацы фарстамæ аздахын. Уый фæдыл горæты администрацийы разамонæг Милдзыхты Вячеслав фæбæрæг кодта, фæндаджы арæзтады аргъ 130 милуан сомы кæй у, уый. Йæ ныхасмæ гæсгæ, фæндаджы уæлцъарæй уæлдай, хъæуы коммуникацитæ баивын дæр.
Æмбырды ма Сергей Меняйло республикæйы Цæрæнуатон-коммуналон хæдзарад, артаг æмæ энергетикæйы министрад æмæ Фæндаггон хæдзарады комитеты сæрдар Солыты Тариэлæн бафæдзæхста, цалынмæ донивылдтытæ нæ райдыдтой, уæдмæ цæугæдæтты донвæдтæ ссыгъдæг кæнын, уæлдайдæр та – хидты бынмæ.
Республикæйы Сæргълæууæджы уынаффæйæ Дзæуджыхъæуы астæуккаг скъола «Эрудит» хæсдзæн Уæрæсейы Федерацийы Хъæбатыр Мæрзойты Василийы ном.
Æмбырды ныхас цыд æндæр ахсджиаг фарстатыл дæр.
ХЪОЙБАЙТЫ Галинæ
