Сæрмагонд æфсæддон операцийы архайджытæ систы, Дзæуджыхъæуы гарнизоны Афицерты хæдзары цы ахадгæ дзыллон историон-рухстауæн мадзал арæзт æрцыд, уый кадджын уазджытæ.
Уыцы бон Афицерты хæдзармæ æрбамбырд сты историон-патриотон фестиваль «СВОи Герои»-йы архайджытæ: хицаудзинады оргæнты бæрнон кусджытæ æмæ тыхы структурæты службæгæнджытæ, æхсæнадон иугæндтæ æмæ культурæйы кусæндæтты минæвæрттæ, ахуырдзау фæсивæд æмæ ветерантæ…
Фестиваль арæзт æрцыд Уæрæсейы æфсæддон-историон æхсæнады хъæппæрисæй. Мадзалы программæйы уыдысты бирæ алыхуызон фембæлдтытæ æмæ равдыстытæ.
Афтæ, чингуыты презентацийы равæрдтой Уæрæсейы истори æмæ абоны цард, дунеон ахастдзинæдты бындурон фæзилæнтæ æвдисæг хъæздыг æрмæджытæ, равдыстытæй иуы та фенæн уыд æфсæддонты уæлæдарæсы хуызæгтæ, стæй Фыдыбæстæйы Стыр хæсты азты хæцæнгæрзты макеттæ. Уыимæ, экспозицийы бынат уыд, сæрмагонд æфсæддон операцийы нысантæ æххæстгæнгæйæ, Уæрæсейы Гæрзифтонг тыхтæ цы нырыккон хæцæнгарзæй пайда кæнынц, уый хуызæгтæн дæр.
Фестивалы иннæ фæзуаты та скъоладзаутæн скодтой «Лæгдзинады уроктæ» æмæ æндæр фембæлдтытæ хæсты ветерантæ æмæ сæрмагонд æфсæддон операцийы архайджытимæ, историктæ-эксперттæ æмæ æхсæнадон-рухстауæн иугæндты уæнгтимæ.
Фестивалы кæронбæттæн рафидыдта стыр концертæй. Аивады зындгонд архайджытæ æмæ сфæлдыстадон коллективтæ сценæмæ рахастой адæмон æмæ пат-
риотон зарджытæ, акодтой национ кæфтытæ.
«Сæрмагонд æфсæддон операци ма иу æвдисæн сси, бирæнацион Уæрæсейы адæмтæ Фыдыбæстæйыл æнувыд кæй сты, йæ граждæнты сабыр цард æмæ фæрныг фидæны сæраппонд цавæрфæнды карз тохы дæр кæй балæудзысты, уымæн», – фестивалæн хатдзæгтæ кæнгæйæ, бафиппайдта Цæгат Ирыстоны национ политикæ æмæ æддагон бастдзинæдты министр Бæгъиаты Алан.
Дмитрий АСТАХОВ,
къамтæ систа
Татьянæ ШЕХОДАНОВА
