РЦИ-Аланийы Æнæниздзинад хъахъхъæнынады министрад, Цæгат Ирыстоны паддзахадон медицинон академи æмæ клиникæ «Мега»-йы хъæппæрисæй нæ республикæйы ныр æртыккаг хатт арæзт цæуы, Цæгат Ирыстоны медицинæйы рæзтмæ зынгæ æвæрæн чи бахаста, нырыккон медицинæйы æнтыстдзинæдтæ кæй къухы бафтыд, уыцы дохтырты профессион преми райсыны конкурс «МегаДоктор».
Мадзалы архайдтой: РЦИ-Аланийы Республикон клиникон рынчындоны сæйраг дохтыр Лагкуты Мæхæмæт, клиникæ «Мега»-йы хайады сæргълæууæг Гаглойты Альбинæ æмæ Сывæллæтты республикон клиникон рынчындоны урологийы хайады сæргълæууæг, ацы конкурсы ивгъуыд азы уæлахиздзау Асхаб-Хож Шидаев. Гаглойты Альбинæ радзырдта, ног конкурсы хæстæ тынг вазыгджын мадзал кæй сты, нæ республикæйы медицинæйы къабаз раззагдæр æмвæзадмæ ракæнынæн, уый тыххæй.
– Фыццаг аз конкурсы архайынмæ кæд 38 курдиаты райстам, уæд дыккаг аз та уыдысты фылдæр. Уыцы санчъех профессион æмæхсæнадæн фæлварæны хуызæн уыдис, ныр та ссис традицион. Преми райсыны конкурсы нысантæ æнæивдæй баззадысты, нæ республикæйы медицинæйы рæзтыл зæрдиагæй архайгæйæ, кæй къухы бафтыд æнтыстдзинæдтæ, уыцы хуыздæр æмæ æнтыстджындæр дохтырты, наукон медицинæйы кусджыты сбæрæг кæнын æмæ сæ сæрмагонд премийæ схорзæхджын кæнын, – загъта Гаглойты Альбинæ.
– Мæ дæсныйады æз архайын клиникон куысты æмвæзад бæрзонддæр къæпхæнмæ сисыныл. Канд операцитæ кæнынæй нæу дохтыры дæсныйад. Хъæуы хиуыл иудадзыг кусын, ног мадзæлттæ агурын рынчыны дзæбæх кæнынæн, – дзырдта Асхаб-Хож Шидаев. Лагкуты Мæхæмæт та радзырдта компани «Мега»-йы архайды фæдыл.
– Фарон конкурсы архайджыты куыстыты фæтк карз уыдис. Æмбарæм æй – ерыстæ сты, фæлæ ахъаззаджы мадзал. Клиникæ «Мега» кæд хицæн адæймаджы къухы ис, уæддæр хицæн адæймæгты клиникæтæй ахæм хæстæ «Мега»-йæ уæлдай никæцы сарæзта. Хорз дохтырты куыст æмæ æнтыстдзинæдтæ хъуамæ бæрæггонд цæуой æмæ сын аргъ дæр кæнæм, – загъта Лагкуйы-фырт.
Профессион конкурс арæзт у: Цæгат Ирыстоны фæзуаты фыццаг операци скæныны,
диагностикæ æмæ низтæ дзæбæх кæнынæн ног мадзæлттæ агурын æмæ наукон публикацийы номинацитæй.
Саутæты Тамилæ, къам систа
Татьянæ Шеходанова
