Ацы къуыри УФ-йы Федерацийы Советы уæнг Цæгат Ирыстонæй Виталий НАЗАРЕНКО кусы регионы. Республикон министрадтæ æмæ ведомствæты разамонджытимæ сенаторæн цы фембæлдтытæ ис, уыдоны ныхас цæуы регионы дарддæры социалон-экономикон райрæзты нысантыл.
Афтæ, знон Виталий Назаренкойæн фембæлд уыд РЦИ-Аланийы цæрæнуатон-коммуналон хæдзарады, артаг æмæ энергетикæйы министр Хъараты Тимуримæ.
Ныхасы архайджытæ бæстон æркастысты республикæйы коммуналон хæдзарады абоны уавæрмæ, æрдзырдтой цæрæнуатон æмæ энергетикон компексты модернизацийы пълантыл, лæггæдты хæрзхъæддзинад æнаипдæр кæныныл. Уыимæ, къабазы цы лыггæнинаг фарстатæ ис, уыдонмæ цæстдард ис Федерацийы Советы уæнгты ‘рдыгæй, сенаторты закъонæвæрынадон хъæппæристæ уавæрыл хуыздæрырдæм ахадынц.
– Министримæ рæгъмæ рахастам цæрæнуатон-коммуналон ахсджиагдæр лыггæнинаг фарстатæ. Фæлхасгæнджыты тынгдæр цы фарстатæ тыхсын кæны, уыдонмæ уыдзæн фыццаградон цæстдард. Коммуналон æмæ энергетикон комплексы æнæкъуыхцы куыст адæмы æрвылбоны цардархайдыл комкоммæ кæй ахады, уый зæрдыл даргæйæ, баныхас кодтам дарддæры æмархайды пълантыл, – фембæлды фæстæ радзырдта Виталий Назаренко.
Сенаторæн ахæм фæткыл фембæлдтытæ уыд республикæйы арæзтад æмæ архитектурæйы министр Бетанты Марат æмæ экономикон рæзты министры хæдивæг Хлойты Тамерланимæ. Къуырийы кæронмæ ахæм фембæлдтытæ уыдзæн æндæр республикон ведомствæты минæвæрттимæ дæр.
ÆЛБОРТЫ Зæлинæ,
УФ-йы сенаторы
æххуысгæнæг
