Фыййагдоны Пульмонологон центры рынчынтæ æмæ кусджыты раивтой фæсивæдон центр «Барс»-мæ. Цалынмæ Пульмонологон центры рацарæзт æххæстгонд цæуа, уæдмæ уал уым æрбынæттон.
Зындгонд куыд у, афтæмæй рынчындоны рагон бæстыхай нырыккон медицинон домæнты аккаг нал уыд, афтæ зæгъæн ис, æмæ æнæниздзинадыл æвзæрырдæм дæр ахадыдта. Ныртæккæ уал зæронд корпусы цалцæ-джы стыр куыстытæм бавнæлдтой. Æппæт куыстытæ кæронмæ куы ахæццæ уой, уæд рынчындон сифтонг кæндзысты хъæугæ æппæт медицинон ифтонггæрзтæй, аппараттæй, фæрæзтæй.
Хæстулæфт, хуыфт æмæ æндæр ахæм фæзындтытимæ ардæм æрбахауд Григорий Разлада. Йæ ныхасмæ гæсгæ, ныр дыккаг аз ам йæхи дзæбæх кæны. Цалынмæ центр æхгæд у, уæдмæ уал йæхи дзæбæх кæны «Барс»-ы, палатæтæм хорз базылдысты, сты райдзаст æмæ фадатджын. «Ис дзы палатæйы цур санитарон æппæт уавæртæ, сынтæ-джытæ дæр дзæбæх сты. Ам тынг бирæ адæм сæхи фæдзæбæх кæнынц, уымæ гæсгæ дзы къуындæггомау у. Дохтыртæ, медицинон хотæ сты къæрцхъус, æххуысмæ цæттæ», – зæгъы рынчын.
Фæсивæдон центры уавæртæ фæивтой, медицинон æххуыс дæттыны онг сæ скодтой. Палатæтæ, процедурон, ординаторон – алцыдæр дзы ис. Афтæ зæгъæн ис, æмæ бынат раивын нæ фæзынд медицинон æххуыс дæттыныл. Пульмонологон центры сæйраг дохтыр Гаглойты Алан куыд зæгъы, афтæмæй рынчынты рæуджыты низтæ цæуыл фæиртасынц, уыцы ифтонггæрзтæ ивд æрцыдысты 2021 азы, хъуыддаг бантыст Сергей Меняйлойы фæрцы.
«Суанг нæм ис бодиплетизмограф, уый стæм аппарат у. Уый фæрцы нæ бон вæййы рæуджыты хъæндзинæдтæ раиртасын. Уæлдайдæр та, коронавирусы фæстæ цы фæстиуджытæ баззайы, уыдон», – фæбæрæг кодта Гаглойы-фырт. Пульмонологон центры ис 107 бынаты, ардæм æххуысы фæдыл цæуынц æндæр регионтæй дæр. Ома, æрмæст дзæбæх кæныны курс райсыны тыххæй нæ, фæлæ ма хъуамæ низыхатт фæтынгдæр кæнын ма бауадзыны тыххæй дæр райсой хъæугæ дзæбæхгæнæн мадзæлттæ.
Ацы рынчындон арæзт æрцыд ивгъуыд æнусы 60-æм азты, фæстæдæр медицинон кусджытæ æмбæлын райдыдтой алыхуызон хъæндзинæдтимæ. Уыдæттæ æвзæрырдæм зындысты рынчынтæн медицинон æмбæлгæ æххуыс дæттыныл. Фарстамæ æргом аздæхта РЦИ-Аланийы Сæргълæууæг Сергей Меняйло. Федералон æмвæзадыл фарста фидаргонд æрцыд, куыстытæ кæронмæ ахæццæ уыдзысты 2028 азы.
Вадим Ганжа
