2014 азы 18 мартъийы Уæрæсейы Федерацийы Президент Владимир Путин бафыста Хъырым Уæрæсеимæ баиу кæныны фæдыл бадзырд. Уыцы бон нæ бæстæйы историйы сыгъзæрин дамгъæтæй фыст æрцыд – Хъырым æрыздæхт йæ Фыдыуæзæгмæ.
Знон Дзæуджыхъæуы, Советон Цæдисы Хъайтар Къесаты Астаны цыртдзæвæны раз ацыд акци «Æнустæм Уæрæсеимæ иумæ». Бацæттæ йæ кодтой РЦИ-Аланийы Национ политикæ æмæ æддагон бастдзинæдты фæдыл министрад, Дзæуджыхъæуы администрацийы Æхсæнадон совет æмæ нæ республикæйы Хæлардзинады хæдзар. Акци ма арæзт цыдис, Денджызон-дæлдондзæуæджы боны кадæн. Мадзалы архайдтой алы хæстыты ветерантæ, скъоладзаутæ, фæсивæдон организацитæ æмæ национ-культурон æхсæнадты æмæ муниципалон хицаудзинады оргæнты минæвæрттæ. Æмбырд байгом кодта æмæ акцийы фæдыл радзырдта Хæлардзинады хæдзары директоры хæдивæг Хъайтыхъты Тамарæ.
– Абон Къесаты Астаны цыртдзæвæны раз хуымæтæджы нæ æрбамбырд стæм. Хъырым Уæрæсейы скондмæ куы æрбаздæхт, уыцы историон цауæй уæлдай ма нæ
бæстæ 19 мартъийы бæрæг кæндзæн Денджызон-дæлдондзæуæджы бон дæр. Къесаты Астан фидар тæгтæй сбаста Хъырым æмæ Ирыстон, Хъырым æмæ Уæрæсе. Йæ хæстон æнæмæлгæ сгуыхтдзинад та рох никуы уыдзæн фæлтæртæй, – загъта Хъайтыхъты Тамарæ. Акцийы раныхас кодта Арæнхъахъхъæнæн службæйы булкъон Александр Охотников дæр. Уый загъта:
– Хъырым канд фæзуат нæу, Хъырым у адæмы культурæ, истори æмæ нæ иумæйаг æвзаджы фæз. Нæ бæстæмæ куы æрбаздæхт, уæдæй фæстæмæ бирæ иумæйаг
хъуыддæгтыл архайæм нæ Фыдыбæстæйы фæрныгадæн. Хъырымимæ баст у не ‘мзæххон хъайтар Къесаты Астаны ном дæр. Æвæццæгæн, мæрдты уый абон цин кæны, йæ туг цы сакъадахы сæрибардзинадыл ныккалдта, уый фæстæмæ йæ бынатыл кæй сæмбæлд, ууыл. Чысыл не сты нæ хъайтартæ, алчидæр дзы йæ цард снывонд кодта Уæрæсейы хæрзамондæн. Нæ хæс у зæрдылдарын сæ хæстон сгуыхтдзинæдтæ æмæ сæ фæлтæрæй-фæлтæрмæ хæццæ кæнын, – загъта булкъон.
Мадзалы ма раныхас кодтой Дзæуджыхъæуы администрацийы сæргълæууæджы уынаффæгæнæг Маматы Хъазыбег, æфсæддон службæйы ветеран Александр Ушаков, Хæстон æфсымæрдзинады организацийы номæй Мамиаты Сергей, Салдæтты мадæлты комитеты сæрдар Моурауты Зæлинæ. Уый фæстæ акцийы архайджытæ иу минут æдзæмæй алæууынæй ссардтой Къесаты Астаны рухс ном, скъоладзаутæ æмæ фæсивæдон организациты минæвæрттæ та сæвæрдтой хъайтары цыртдзæвæны раз дидинджыты бæстытæ.
Саутæты Тамилæ,
къам систа
Татьянæ Шеходанова
