Куыд республикæйы иннæ муниципалитетты, афтæ Мæздæджы районы дæр æххæстгонд цæуынц хуыздæр ахуыргæнджытæ æмæ хъомылгæнджыты сбæрæг кæныны фæдыл республикон конкурсы бынæттон къæпхæны мадзæлттæ.
Ахуырады кусджыты профессион дæсныдзинады конкурсы архайынвæнд чи скодта, уыцы специалистты дæсныдзинадæн аргъ кодта сæрмагонд къамис. Гом уроктæ, семинартæ æмæ æндæр ахуырадон-хъомыладон мадзæлттæ саразгæйæ, конкурсанттæ равдыстой сæ арæхстдзинад. Æмæ ныр конкурсон къамис хуыздæрты нæмттæ сбæрæг кодта.
Афтæ, номинаци «Азы хъомылгæнæг»-ы уæлахиз-дзауыл нымад æрцыд
Наталья Косивченко (Мæздæ-джы 9-æм рæвдауæндоны минæвар). Уымæй уæлдай, конкурсон къамисы уынаффæйæ сæрмагонд хæрзиуджытæ саккаг кодтой иннæ рæвдауæндæтты кусджытæ – Лия Хачатурян, Мадина Израова, Нуне Макарян æмæ Виктория Федоренкойæн.
Номинаци «Азы ахуыргæнæг»-ы хуыздæрыл нымад æрцыд Мæздæджы 7-æм скъолайы минæвар Татьяна Жатикова. Ацы номинацийы сæрмагонд призтæ райстой Светлана Лукожева, Марина Великая æмæ Альбина Кагаова.
Уæлахиздзаутæ æмæ призертæй уæлдай, конкурсы дипломтæ саккаг кодтой ерысы архайджыты иннæ къордæн дæр.
Республикон конкурсы муниципалон къæпхæны уæлахиздзаутæ æмæ иннæ архайджытæн арфæтæ ракодта Мæздæджы районы бынæттон хиуынаффæйады администрацийы сæргълæу-
уæг Станислав Никифоров.
Нæ уацхæссæг
