Æрæджы Мæскуыйы уыд курдиатджын фæсивæды сгуыхтдзинæдты ХХ-æм Æппæтуæрæсеон конкурс «Уæрæсейы национ бынтæ». Ацы мадзал хаст æрцыд, Уæрæсейы Рухсады министрад цы номхыгъд сфидар кодта, уыдонмæ. Уый дзуры, конкурсæн стыр ахадындзинад кæй ис, ууыл.
Цæгат Ирыстонæй дзы архайдтой 32 скъоладзауы. Уыдон иууылдæр сты, национ проект «Фæсивæд æмæ сывæллæттæ»-йы фæлгæты æххæстгонд чи цæуы, уыцы олимпиадæтæ, ахуырадон центр «Вершина»-йы интенсивтæ æмæ ахуырадон программæты архайджытæ.
Мадзал арæзт цæуы, наукон æмæ иртасæн куыст чи кæны, уыцы хистæр-къласонтæ æмæ студенттæн. Конкурсы ис 30 номинацийы бæрц: биологи æмæ физикæйæ райдай, æмæ суанг менеджмент æмæ лингвистикæйæ фæу.
Нæ республикæйы делегацийы уæнгтæ сты, XXIII-æм Æрыгон иртасджыты республикон конкурс «Ступень в науку»-йы уæлахиздзаутæ. Уый арæзт æрцыд РЦИ-Аланийы Ахуырад æмæ наукæйы министрад æмæ Сывæллæтты сфæлдыстады республикон галуаны хъæппæрисæй.
Мæскуыйы Ирыстоны кад чи хъахъхъæдта, уыдоны ’хсæн уыдысты Алагиры 3-æм скъолайы ахуырдзаутæ: Кодзырты Ланæ (11-æм кълас) æмæ Тамерлан Мецелов (8-æм кълас).
Кодзырты Ланæ «История, военная история»-йы къабазы архайды тыххæй хорзæхджын æрцыд II-æм къæпхæны дипломæй. Тамерлан Мецелов та архайдта «Родословие»-йы къабазы æмæ уый дæр хорзæхджын æрцыд II-æм къæпхæны дипломæй.
Ахуырдзауты наукон разамонæг Дарчиты Георгийы чызг Дианæ хорзæхджын æрцыд сæрмагонд хæрзиуæгæй «За подготовку призера». Уый у курдиатджын сывæллæтты æмæ фæлтæрдджын разамонæджы иумæйаг фæллойы стыр æнтыст-
дзинад.
Сывæллæттæ æмæ ахуыргæнджытæ зæрдиаг арфæ кæнынц, сæ балцæн сын æхцайы фæрæзтæй чи баххуыс кодта, уыцы спонсортæн. Уыдон сты Хетæ-
джы къохы кувæндоны минæвæрттæ æмæ Алагиры дукани «ЦУМ»-ы директор Мамытты Марик.
Ноджы ма нæ фæбæрæг кæнын фæнды, конкурс «Уæрæсейы национ бынтæ» фæсаууонмæ дæр кæй цæуы, уый. Уым дæр Алагиры 3-æм скъолайы ахуырдзаутæ сæхи æнтыстджынæй равдыстой. Конкурсы фæсаууонмæ къæпхæны уæлахиздзаутæ систы Гюнель Гурбанова (йæ разамонæг – Датиты Маринæ) æмæ Быгъдаты Миланæ (йæ разамонæг – Хъаныхъуаты Мария). Датиты Маринæ æмæ Хъаныхъуаты Мария дæр хорзæхджын æрцыдысты сæрмагонд хæрзиуджытæй «За подготовку призера».
Ахæм мадзæлттæ ахъаз сты национ проект «Фæсивæд æмæ сывæллæттæ» царды æххæст кæнынæн.
ХЪОЙБАЙТЫ Галинæ
