Дзæуджыхъæуы Вахтанговы хæдзары уыд ивгъуыд æнусы райдайæны Кавказы æфсæддон разамынды минæвар, булкъон Бигъаты Никъалайы чиныг «Воспоминания»-йы презентаци.
Бигъайы-фырт йæ чиныгмæ бахаста регионы территорийыл æфсæддон службæ æмæ эмиграцийы заманы тыххæй мысинæгтæ. Дзыллон мадзалы архайдтой нæ республикæйы Парламенты Сæрдар Тускъаты Таймураз, стæй наукон æхсæнад æмæ сфæлдыстадон интеллигенцийы минæвæрттæ.
– Мидисджын чиныджы фæрцы махæн ис ссæдзæм æнусы райдайæны Кавказы æфсæддон æмæ административон уавæримæ ногæй базонгæ уæвыны фадат. Нæ абоны хæс у ивгъуыд заман æрцæуæг цаутæ биноныг рахатын æмæ сын æмбæлгæ хатдзæгтæ скæнын. Бигъайы-фырт кæй тыххæй фыссы, уыцы заман æрцыдысты ахадгæ политикон цаутæ. Чиныг «Воспоминания»-йы фæрцы махæн ис ивгъуыд æнусы райдайæны социалон-экономикон æмæ æхсæнадон-политикон уавæр биноныг рахатыны фадат. Ныхас кæуыл цæуы, уыцы заман алыхуызон политикон зондахаст æвдисæг хъуыдыгæнджытæ цыфæндыйæдæр уыдысты патриоттæ. Нырыккон æхсæнад цæмæй рæза, уый тыххæй ивгъуыд æнусы æрцæуæг цаутæн æмбæлы биноныг хатдзæгтæ скæнын, – ныхас кæнгæйæ, загъта Тускъайы-фырт.
Историктæ Феликс Киреев æмæ Юрий Пыльцын цы чиныгыл бакуыстой, уымæн наукон редактор у æмæ йæ бавдыста Уæрæсейы Историон æхсæнады правленийы сæрдар, историон наукæты доктор Гæгкуыты Руслан.
Зæронд Бæтæхъойыхъæуæй рацæуæг Бигъаты Никъала йæ чиныджы æвдисы Кавказы разамонджыты къанвойы службæ æмæ эмиграцийы райдайæны цаутæ. 1902 аз Никъала службæ кæнын райдыдта кънйаз Григорий Голицыны къанвойы, фæстæдæр та æрцахста граф Илларион Воронцов-Дашковы къанвойы командæгæнæджы бынат.
Хицæутты (цытджын кънйаз Николай Николайы фырт-кæстæры нымайгæйæ) æдасдзинадæн фадæттæ аразгæйæ, Бигъайы-фырт регионы администрациимæ комкоммæ баст уыд. Паддзахады разамонджыты хъахъхъæнæг булкъон æвдисæн уыд Фыццаг дунеон æмæ Мидбæстон хæстыты заман æрцæуæг цаутæн.
Чиныджы автор биноныг иртасы 1918-1920 азты Терчы облæсты уавæр, стæй революцийы заман адæмыхæттыты ‘хсæн вазыгджын ахастдзинæдтæ.
Республикæ Цæгат Ирыстон-Аланийы Парламенты пресс-службæ
