РЦИ-Аланийы Сæргълæууæг Сергей МЕНЯЙЛО фембæлд Цæгат Кавказы федералон университеты ректор Татьяна ШЕБЗУХОВАИМÆ. Ныхасы архайджытæ се ’ргом аздæхтой республикæ æмæ уæлдæр ахуыргæнæндоны æппæтвæрсыг æмгуыстад рапарахат кæныны фарстатæм.
Ныхасы рахæцæн уыд Цæгат Ирыстоны 2030 азы онг æнæкъуыхцы экономикон райрæзты бындурон программæ æмæ уыцы документы уагæвæрдтæ æххæст кæнынмæ Цæгат Кавказы федералон университеты ахуыргæндтæ æмæ иннæ специалистты æргом раздахын, сæ зонадон æмæ технологон фæлтæрддзинадæй сын спайда кæнын.
– Мах цæттæ стæм Цæгат Кавказ æмæ æппæт Уæрæсейы раззагдæр наукон-ахуырадон кусæндæттимæ æнгомдæр æмархайдмæ, уымæн æмæ фыццаградон нысантæй иу у республикæйы алы къабæзты кусæг специалистты дæсныдзинад æмæ фæлтæрддзинад бæрзонддæр кæнын. Мæ зæрдæ дарын, Цæгат Кавказы федералон университетимæ æмгуыстад комкоммæ кæй сахаддзæн нæ специалистты цæттæдзинадыл, фидар бындур кæй æрæвæрдзæн ног иумæйаг наукон æмæ экономикон проекттæ царды рауадзынæн. Регион сæрмагонд æргом здахы ахуырады къабазы нывылад æмæ дарддæры райрæзтмæ. Уыцы хъуыддаджы махæн, æнæмæнг, пайдайаг уыдзысты федералон университеты ахуыргæндтæ æмæ иннæ минæвæртты зонындзинæдтæ æмæ технологон проекттæ, – фæбæрæг кодта Сергей Меняйло.
Æппæт уыцы фарстатыл ныхас адарддæр кæнгæйæ, Татьяна Шебзухова фæндон бахаста, цæмæй фыццаградон цæстдард уа республикæйы экономикæйы æппæт къабæзтæн дæсны специалисттæ цæттæ кæнын æмæ аграрон-промышленнон комплексты архайдмæ фылдæр хæссын наукон-технологон инновацитæ.
– Зæгъæм, хъæууонхæдзарадон куыстады кой кæнгæйæ, нæ университеты специалисттæ æнтыстджын куыст кæнынц халсартæ æмæ дыргъты нырыккон селекцийы ног хуызтыл, хорз бæрæггæнæнтæ æфты сæ къухы биологон æмæ агротехнологон проекттæ æххæст кæныны хъуыддаджы дæр. Уымæй уæлдай, университеты специалисттæ кусынц рекреацион-туристон тæлмыты, транспортон логистикон комплекстæ æмæ экономикæйы иннæ къабæзтæн æндæр амалхъомадон проекттæ цæттæ кæныныл дæр. Æппæт уыцы гæнæнтæ, мæ хъуыдымæ гæсгæ, пайдайаг уыдзысты Цæгат Ирыстонæн, ног хъомыс бауадздзысты регионы экономикæмæ, – бафиппайдта Татьяна Шебзухова.
Фембæлды архайджытæ æрдзырдтой æндæр ахсджиаг фарстатыл дæр. Сæрмагонд æргом аздæхтæуыд Цæгат Кавказы федералон университет æмæ республикæйы уæлдæр ахуыргæнæндæтты æмархайд фенгомдæр кæныны фарстамæ дæр.
РЦИ-Аланийы Сæргълæууæг æмæ Хицауады пресс-службæ
