Уæрæсейы профилон ведомствæты æмвæзадыл дарддæр архайд цæуы æхсæнадон транспорты модернизацийы программæ æххæст кæныныл. Амынд программæйы фæлгæты УФ-йы Транспорты министрад сбæлвырд кодта, бæстæйы регионтæй ацы аз автобустæ æмæ æхсæнадон транспорты æндæр техникон фæрæзтæ балхæнынæн паддзахадон субсидитæ чи райсдзæн, уыдоны номхыгъд.
Министрады пресс-службæйы хъусынгæнинагмæ гæсгæ, 2026 азы ахæм субсидитæ райсдзысты 14 уæрæсейаг регионы. Уыдоны нымæцы – Республикæ Цæгат Ирыстон-Алани дæр.
Федералон ведомствæйы сæрмагонд къамис хорз аргъ скодта, республикæ æхсæнадон транспорты ног фæрæзтæ балхæныны нысанимæ цы курдиат бацæттæ кодта, уымæн. Уыимæ, федералон экспертон къорды хатдзæгмæ гæсгæ, регион ахадгæ куыст кæны транспортон политикæйы къабазы, æхсæнадон транспорты архайд банывыл кæныны программæ къæпхæнгай царды уагъд цæуы.
Æппæт уыцы æууæлтæ хынцгæйæ, федералон министрады уынаффæйæ ацы аз регион райсдзæн 83,3 милуан сомы. Уыцы фæрæзтæй æлхæд æрцæудзысты ноджыдæр ма 46 чысыл автобусы. Цæгат Ирыстоны Транспорты комитеты куыд фæбæрæг кодтой, афтæмæй уыцы техникон фæрæзтæ хорзырдæм сахаддзысты бæлццæттæласæн куысты нывыладыл. Уыимæ, сæ фылдæр хатт кусдзысты муниципалон маршруттыл. Специалистты хатдзæгмæ гæсгæ, ног транспортон фæрæзты фæрцы зынгæ фæахадгæдæр уыдзæн лæггæдты техникон æмæ экологон æдасдзинад дæр.
2026 азы 1 июлы онг хъуамæ фидаргонд æрцæуа амынд транспортон фæрæзтæ балхæныны фæдыл паддзахадон ба-
дзырд. Куыд нысангонд цæуы, афтæмæй ног техникæ республикæмæ хъуамæ сласой азы кæронмæ.
Транспорты комитеты куыд фæбæрæг кодтой, афтæмæй ведомствæ дарддæр дæр æххæст кæндзæн къабазы модернизацийы программæтæ, архайдзæн бæлццæттæласæн лæггæдты хæрзхъæддзинад æнаипдæр кæныныл…
Дмитрий Астахов
