Хетæгкаты Къоста ацы дунейы куы нал ис, уæдæй нырмæ рацыд 120 азы. Алы заманты йæ номыл бирæ зæрдылдарæн мадзæлттæ арæзт æрцыд. Æрæджы Къостайы рухс ном мысынæн Елхоты Къубалты фондз æфсымæры уынджы фарсмæ фæзыл скодтой бæхтыл дугъ. Ахæм хъуыддаг Къостайы номыл арæзт æрцыд фыццаг хатт.
Дугъы архайджытæ æмæ уазджытæн зæрдиаг арфæ ракодтой Кировы муниципалон районы администрацийы сæргълæууæг Батиаты Хъазыбег, районы ветеранты уынаффæдоны сæрдар Бедойты Феликс æмæ Хетæгкаты мыггаджы номæй — Хетæгкаты Мурат.
Бæхты дугъ саразджытæ сты æхсæнадон змæлд «Иудзинад», Æппæтдунеон æхсæнадон змæлд «Аланты Ныхас», Хетæгкаты Къостайы номыл фонд, Хетæгкаты мыггаг, Цæгат Ирыстоны Ахуырад æмæ наукæйы министрад, Кировы муниципалон районы администраци.
Бирæ фæсивæд æрцыд Елхотмæ Цæгат Ирыстоны алы районтæй æмæ ма сыхаг Кæсæг-Балхъары республикæйæ дæр дугъы сæ арæхстдзинад æмæ сæрæндзинад равдисынмæ. Цымыдисаг ма у уый, æмæ барджытæй дыууæ уыдысты чызджытæ.
Ацы бонмæ цæттæгонд концертон программæйы Къостайы æмдзæвгæтæ бакастысты Ирыстоны зындгонд аивады кусджытæ Бæззаты Эдуард, Гуыдиаты Маринæ, Кировы районы Культурæйы хæдзары æвзонг артисттæ Тъехты Аминæ æмæ Бететы Вероникæ.
Дугъы уæлахиздзау ссис елхотаг Гæбæраты Артур, дыккаг бынат бацахста дигорайаг Толасты Давид. Æхсæнадон змæлд «Иудзинад» æппæт архайджытæн дæр зæрдылдарынæн балæвар кодта уæйлаг нымæттæ æмæ фысдзармæй худтæ. Сæрмагонд лæвар Гæбæраты Артурæн — хæрзхъæд сæракæй конд бæхифтындзæн дзаумæттæ — ракодта Хетæгкаты мыггаджы хистæр Мурат.
Дыккаг дугъ та Елхоты сæргълæууæг Гуытъиаты Эльбрусы хъæппæрисæй рауагътой, ацы хъæуы цæрджытæй Фыдыбæстæйы сæрвæлтау алы рæстæджыты тохы быдыры чи фæмард, уыдоны номыл. Кæронмæ дзы фыццаг æрбацыдысты елхотаг Хуыбылты Æхсары бæх æмæ сыхаг Кæсæг-Балхъары Плановскы хъæуккаг Артур Конов.
— Дугътæ нæм æрмæстдæр цины фæдыл куыд уой, ахæм арфæ не ‘ппæты дæр уæд. Æвæццæгæн, нæ алкæй зæрдæйæн дæр фенцондæр ис, абон ацы фыдæлтыккон хъуыддаг кæй сарæзтам, уымæй. Æгайтма нæ ирон æгъдау нæ рох кæнæм. Стыр бузныг, фыццаджыдæр, Кировы район æмæ Елхоты разамындæн, дугъ саразыныл чидæриддæр бацархайдта, уыдонæн, — загъта кæронбæттæны мадзал амонæг, Цæгат æмæ Хуссар Ирыстоны адæмон артист Цæриаты Валери.
Дарддæр дугъы архайджытæ сæ фæндаг акодтой Дзæуджыхъæумæ, Къостайы ингæны цур цы ‘гъдау æмбæлы, уый сæххæст кæнынмæ.
КЪУБАЛТЫ Аркади,
авторы ист къам
