Ацы бонты Гуырдзыстоны сæйраг горæт Тбилисийы йæ тæмæны бацыд Европæйы чемпионат дзюдойæ. Архайынц дзы Европæйы 46 паддзахадæй 419 дзюдоисты. Уыдонæй 183 сты сылгоймæгтæ, 236 та – нæлгоймæгтæ.
Тбилисийы Европæйы чемпион суæвыныл чи тох кæндзæн, уыдоны ’хсæн ис Олимпиаг хъæзтыты 7 уæлахиздзауы æмæ Европæйы 36 чемпионы. Уый дзурæг у, ерыстæ тынг цымыдисаг кæй сты, ууыл.
Нæлгоймæгты чемпионаты архайынц 7 уæзы. Уæрæсейæ дзы цы 9 дзюдоисты ис, уыдон та хæцынц 5 уæзы, 60 æмæ 73 кг онг уæзты нæ архайгæйæ.
Сылгоймæгты чемпионаты 9 уæрæсейаг чызджы хæцынц 7 уæзы дæр. Ерысты Уæрæсейы командæйы рæнхъы ис Таймазты Мæдинæ (70 кг). Ноджыдæр ма иу ирон чызг, Хъайсынты Мæдинæ, чемпионаты архайы Азербайджаны номæй.
Азербайджаны командæйы рæнхъыты ма сты Цъыккаты Зелим (81 кг) æмæ Олимпиаг хъæзтыты уæлахиздзау Коцойты Зелим (100 кг). Ирыстойнаг дзюдоист Федор Целидис Европæйы чемпионаты 90 кг онг уæзы хæцы Грецийы номæй.
Тбилисийы Уæрæсейы дзюдоисттæ 2022 азæй абоны онг фыццаг хатт татамимæ рацæудзысты Уæрæсейы тырысаимæ, æмæ сæ фæуæлахизы номыл райхъуысдзæн нæ бæстæйы гимн. Уыцы уынаффæ рахаста Дзюдойы æппæтдунеон федераци.
Ерысты фыццаг бон, 16 апрелы, Европæйы чемпионы ном рамбылдта, 66 кг онг уæзы хæцгæйæ, дунеон турнир «Стыр згъæрхуд»-ы 3 хатты уæлахиздзау Мурад Чопанов, æмæ йæ номыл Тбилисийы Спортивон галуан «Олимпийский»-ы азæлыд Уæрæсейы гимн. Ирыстоны спортуарзджыты тынг фæнды, нæ бæстæйы гимн ма къорд хатты куыд райхъуыса нæ дзюдоистты кадæн, æмæ уыдонæй иу спорты сгуыхт мастер Таймазты Мæдинæ куыд уа!
Баскаты Уырызмæг
