Ацы бонты уæрæсейаг регионты æххæстгонд цæуынц санитарон сыгъдæгдзинад æмæ фæлгонцады къуырийы мадзæлттæ. Дзыллон зиуты архайынц Цæгат Ирыстоны горæттæ æмæ хъæуты цæрджытæ дæр.
Зæгъæм, Дзæуджыхъæуы администрацийы хъæппæрисæй горæтæгтæ бафснайдтой бирæ æхсæнадон бынæттæ. Фæскомцæдисон парк, Афгайнаг сквер, галуан «Металлург»-ы алыварс фæзуат… Ацы æмæ иннæ æхсæнадон тæлмытæ ногæй сæ хуыз скалдтой.
Горæты администрацийы сæргълæууæг Милдзыхты Вячеславы разамындæй зиумæ рацыдысты муниципалитеты кусджытæ. Сæ фарсмæ ‘рбалæууыдысты фæсивæд, алы организациты минæвæрттæ… Сæрмагонд службæтæ зиууæттæн æххуысæн радих кодтой экскаватортæ, уæзласæн хæдтулгæтæ æмæ æндæр техникæ.
Горæты администрацийы куыд фехъусын кодтой, афтæмæй сыгъдæгдзинады ахæм мадзæлттæ араздзысты дарддæр дæр.
Нæ уацхæссæг
