Нæ бæстæйы 64 регионæй æрбафтæг 700 куыстæй фылдæр кæм бавдыстæуыд, æрæджы Мæскуыйы фысымуатон комплекс «Космос»-ы уыд кæстæр скъоладзауты ‘хсæн ахæм æппæтуæрæсеон конкурс «Уæрæсейы национ хæзнатæ».
Цæгат Ирыстонæй конкурсы архайдтой 18 скъоладзауы. Бавдыстой алыхуызон наукон-иртасæн куыстыты проекттæ. Жюри арæзт уыд Мæскуыйы ахуыргæнæндæтты эксперттæй. Хуыздæр куыстытæ бавдисæг сывæллæттæ хорзæхджын æрцыдысты дипломтæ æмæ майдантæй. Нæ республикæйы минæвæрттæй цыппар скъоладзауы – Хъодзаты Анисæ, Олег Рыжанов, Куындыхаты Георги æмæ Бæрозты Дамир – райстой конкурсы уæлдæр хæрзиуджытæ.
Амынд фæсивæдæй иу – Хъодзаты Анисæ – у Дзæуджыхъæуы 11-æм скъолайы 2 «Б» къласы ахуырдзау. Ацы чызг «Ирон фæндыр æмæ йæ культурон ахадындзинад»-ы темæмæ гæсгæ йæ проект бавдыста хайад «Культурон бынтæ æмæ нырыккон аивад»-ы. Анисæ йæ проектыл куыста ахуыргæнæг Светланæ Холодионовайы разамындæй. Презентацийы рæстæг Анисæ рагон ирон музыкалон инструменттæ æмæ нæ республикæйы музыкалон аивадмæ аккаг æвæрæн бахæссæг адæймæгты тыххæй мидисджын хабæрттæ радзырдта, фæстагмæ та фæндырæй аивæй ацагъта «Фыййæутты кафт»-ы мелоди.
Анисæйы хуызæн курдиатджын фæсивæдæй сæрыстыр стæм. Чызгæн нæ зæрдæ зæгъы ног сфæлдыстадон æнтыстдзинæдтæ!
Багаты Ариандæ
