Республикæйы Хицауады æрвылкъуырион аппаратон æмбырд амыдта РЦИ-Аланийы Сæргълæууæг Сергей МЕНЯЙЛО. Ныхас рауад регионы оперативон уавæр æмæ æндæр ахсджиаг фарстатыл. Архайдтой дзы министрадтæ æмæ ведомствæты разамонджытæ, районты хиуынаффæйады администрациты сæргълæуджытæ.
Хицауады Сæрдары хæдивæг Томайты Ирбег фехъусын кодта республикæйы оперативон уавæры бæрæггæнæнтæ.
– Республикæйы хæххон районты дарддæр дæр тæссаг у зæйтæ рацæуынæй. Ивгъуыд къуырийы дæргъы зæйрацыдтытæ бæрæггонд не ’рцыд. Цæгат Ирыстоны сæрмагонд службæтæ архайынц бæрзонд цæттæдзинады уавæры. Цæгат Ирыстоны автоинспекцийы хъусынгæнинагмæ гæсгæ, республикæйы фæндæгтыл æрцыд 83 фæндаггон фыдбылызы. Хъыгдард дзы баййæфтой 13 адæймаджы, дыууæ дзы фæмард сты. Арвыком æмæ Транскамы фæндæгтæ гом сты æппæт автотранспорты
хуызтæн дæр. Республикæйы фæндæгтыл лæууынц 1930 транзитон уæзласæн машинæйы, электронон рады та – 1650. Уæрæсейы Федераци æмæ Гуырдзыстоны арæныл уæлдæр амынд рæстæгмæ дыууæрдæм ахызтысты 23 мин автотранспортон иуæгæй фылдæр æмæ 59 мин адæймаджы, – загъта Томайы-фырт.
Сергей Меняйло арфæ ракодта æппæт бæрнон ведомствæтæн дæр, 9 Майы бæрæгбоны мадзæлттæ æдасæй кæй руаджы ацыдысты, уыдонæн.
Æнæнхъæлæджы уавæрты министрады хъусынгæнинагмæ гæсгæ, дарддæр дæр бæрæггонд цæуы республикæйы цæугæдæтты доны æмвæзад, фидар кæнынц сæ былгæрæттæ.
«Роспотребнадзор»-ы Цæгат Ирыстоны хайады хъусынгæнинагмæ гæсгæ, республикæйы эпидемиологон уавæр у нывыл. ОРВИ-йæ рынчынты нымæц у æрвылазы эпидемион бæрæггæнæнтæй ныллæгдæр. Грипп республикæйы ныр æстæм къуыри бæрæггонд не ’рцыд. Ивгъуыд къуыри ног коронавирусон инфекци разынд 1 адæймагмæ.
Эпидемиологон цæстдарды хайады разамонæг Цæрикъаты Мæдинæ куыд фæбæрæг кодта, афтæмæй, æрдзы хъæбысмæ цæугæйæ, хъæуы æхгæд уæлæдарæс скæнын, уымæн æмæ джыбытæ адæймаджы буары ныссæдзынц æмæ хæссынц алыхуызон низтæ æмæ инфекцитæ, зæгъæм, боррелиоз.
Сергей Меняйло бæрнон ведомствæтæн бахæс кодта, ахуырадон уагдæттæ сæрдыгон фæлладуадзæн рæстæг лагертæм куыд цæттæ сты, уый сбæрæг кæнын.
РЦИ-Аланийы ахуырад æмæ наукæйы министр Алыбегты Эллæйы ныхасмæ гæсгæ, нæ республикæйы æппæт ахуырадон кусæндæттæ дæр кусынц æрвылбоны фæткыл. Грипп æмæ ОРВИ-йы аххосæй æхгæд кусæндæттæ республикæйы нæй.
– Ацы къуыри нæ республикæйы арæзт æрцæудзысты, ирон æвзаджы рæзт æмæ бахъахъхъæныны тыххæй кадджын мадзæлттæ. 14 майы скæндзысты егъау диктант ирон æвзагыл. Фарон дзы архайдтой 7784 адæймаджы. 15 майы сбæрæг кæндзыстæм олимпиадæйы республикон къæпхæны уæлахиздзауты ирон æвзаг æмæ литературæйæ. Архайдзыстæм акци «Ирон фæндыр»-ы. 12 майæ 14 маймæ республикæйы уыдзæн профессион дæсныйады Национ чемпионат, йе ’нæниз-
дзинад хъыгдард кæмæн у, ахæм сывæллæтты ’хсæн. Уый тыххæй Цæгат Ирыстонмæ æрбацыдысты архайджытæ Цæгат Кавказы регионтæ æмæ Хуссар федералон зылдæй. Уыдонимæ сты сæрмагонд æфсæддон операцийы архайæг хæстонты сывæллæттæ, студенттæ æмæ специалисттæ дæр. Уæрæсейы Федерацийы Хицауады Сæрдары хæдивæг Дмитрий Чернышенко раздæр куыд фæбæрæг кодта, афтæмæй Цæгат Ирыстон бæстæйы регионты ’хсæн нымад у чемпионатон змæлды раззагдæрыл. 14 майы мемориал «Барбашовы быдыр»-ы уыдзæн кадетты ардбахæрд. Æдæппæтæй нæ республикæйы кадетты нымæц у 1451 адæймаджы, – фæбæрæг кодта министр.
Республикæйы Сæргълæууæг районты разамонджытæн бафæдзæхста, цæмæй сæ фæзуæтты санитарон уавæрмæ, уæлдайдæр та бырондæттæм, лæмбынæгдæр кæсой. Уыимæ ма, Сергей Меняйло фæбæрæг кодта, национ проектты фæлгæты электронон хыз «Госуслуги»-йы дарддæр дæр кæй ис схъæлæс кæныны бар, Дзæуджыхъæуы æхсæнадон бынæттæй фыццагдæр «Хæрзвадат царды уавæртæ»-йы программæмæ хаст чи æрцæудзæн, уыцы фæзуæттæ равзарынæн.
– Уыдон сты уæлæмхасæн æхцайы фæрæзтæ, æмæ сæ спайда кæнын хъæуы, цæмæй æхсæнадон бынæттæ паддзахады хардзæй цалцæг æрцæуой, – фæнысан кодта Сергей Меняйло.
Цæгат Ирыстоны кæронмæ ахицæн зымæджы хъармгæнæн рæстæг. Уый тыххæй РЦИ-Аланийы Хицауады аппаратон æмбырды фехъусын кодта республикæйы цæрæнуатон-коммуналон хæдзарад, артаг æмæ энергетикæйы министр Хъараты Тимур. Йæ ныхасмæ гæсгæ, министрад дарддæр бавналдзæн ног хъармгæнæн рæстæгмæ цæттæгæнæн мадзæлттæм.
Æмбырды ныхас цыд æндæр ахсджиаг фарстатыл дæр.
ХЪОЙБАЙТЫ Галинæ, къамтæ систа
Татьяна Шеходанова
