Цæгат Ирыстоны Хетæгкаты Къостайы номыл паддзахадон университеты ацыд зындгонд персайнаг поэт, мидисджын историон поэмæ «Шахнаме»-йы автор Хаким Абулькасим Фирдоусийы номарæн æмбырд.
Амынд ахуыргæнæндоны, Цæгат Кавказы хæххон-металлургон институты ахуыргæнджытæ æмæ студенттæ, стæй Иранæй æрбацæуæг уазджытæ кæм архайдтой, ахæм дзыллон мадзал ацыд университеты наукон библиотекæйы бæстыхайы раз æвæрд поэты цыртдзæвæны цур. ЦИПУ-йы Ирайнаг культурæйы центры директор Сохиты Мæдинæ бафиппайдта адæмты иугæнæг зындгонд поэты сфæлдыстадон бынты ахадындзинад.
– Национ хæдбындурдзинад бахъахъхъæнынæн æмæ, персайнаг æвзаджы æндидзынадæн ахъаз чи кодта, абон мах ноджыдæр ма иу хатт уыцы зындгонд поэт Фирдоусийæн кад кæнæм. Уæвгæ, дзырд «Фирдоуси» персайнаг æвзаджы амоны дзырд «дзæнæт». Пысылмон дины дæр ацы дзырд амоны дзæнæты æппæтæй ирддæр æвдисæн. Ацы æууæл нымайгæйæ, Фирдоуси уарзондзинад, сæрибардзинад æмæ цардархайды тыххæй кæй фыста, уыцы æмдзæвгæтæ адæймагмæ æвзæрын кæнынц рæсугъд æнкъарæнтæ, – загъта Сохиты Мæдинæ.
Дзыллон мадзалы раныхасгæнджыты ‘хсæн уыдысты ахуыргæнæндоны историон æмæ ирон филологийы факультетты декантæ Плиты Зæлинæ, Гуытъиаты Эльмирæ, театралон аивады кафедрæйы разамонæг Æлбегаты Алан, актер Цæриаты Валери æмæ æндæртæ.
ЦИПУ-йы историон факультеты студенттæ «Шахнаме»-йæ скъуыддзæгтæ бакастысты ирон, Цæгат Кавказы хæххон-металлургон институты студенттæ та – таджикаг æвзæгтыл. Фæстагмæ æмбырды архайджытæ поэты цыртдзæвæныл дидинджытæ сæвæрдтой.
Дзыллон мадзалы фæстæ Цæгат Ирыстоны Истори æмæ археологийы институты кусæг Темыраты Таймураз персайнаг æмæ ирон æвзæгты лексикон æнгæсдзинæдты тыххæй бакаст лекци.
ЦИПУ-йы пресс-службæ
